នៅក្នុងរឿងនេះមានអ្នកលេងបណ្ដាញសង្គមហ្វេសប៊ុក ជាច្រើនមានការហួសចិត្តដែល ក្រុមសមត្ថកិច្ច ប្រើប្រាស់ពាក្យសម្ដីនិងកាយវិកាមិនសមរម្យដាក់លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជា ដែលជាអ្នកចេះដឹងកំពូលរបស់ជាតិ។មហាជនក៏បាននាំគ្នាប្រតិកម្មជុំទិសថា នេះប៉ះចំបណ្ឌិតផង ! ចុះបើប៉ះចំរាស្ត្រតូច តាចវិញទៅជាយ៉ាងណា ? បើយើងសង្គេតមើល វីដេអូ ដែលសមត្ថកិច្ចបានរុញច្រានលោកបណ្ឌិត សុខ ទូច ចង់ផ្កាប់មុខគឺគាត់នៅតែខំព្យាយាមដើរចេញពី ក្រុមសមត្ថកិច្ចរហូតបានសម្រេច…។
ការបញ្ចេញមតិពីមហាជនតាមបណ្ដាញសង្គមដ៏ច្រើននោះធ្វើឱ្យ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាល ភ្នំពេញ បានចេញសេចក្ដីបំភ្លឺថា នៅវេលាម៉ោង១១:៥៥នាទី ថ្ងៃទី១៧ ខែកុម្ភៈ ឆ្នាំ២០២៥ នៅចំណុចផ្លូវភ្នំពេញហាណូយ មុខសាលាបឋមសិក្សាភ្នំពេញថ្មី កម្លាំងអធិការដ្ឋាននគរបាល ខណ្ឌសែនសុខ សហការជាមួយ កម្លាំងស្នងការដ្ឋាននគរបាល រាជធានីភ្នំពេញ ចុះអនុវត្តរឹតបន្តឹងច្បាប់ចរាចរផ្លូវគោក និងត្រួតពិនិត្យជាតិស្រវឹង ខណៈនោះមាន រថយន្ត១គ្រឿងម៉ាក FORT ពណ៌ទឹកប្រាក់ ផ្លាកលេខរដ្ឋ ០៥២-០៤៣១ បានធ្វើដំណើរក្នុងរថយន្តមានគ្នា២នាក់ (ប្រុស១នាក់ ស្រី១នាក់) ឆ្លងកាត់គោលដៅត្រួតពិនិត្យអនុវត្តរឹតបន្តឹងច្បាប់ចរាចរផ្លូវគោកនៅចំណុចខាងលើខណៈនោះសមត្ថកិច្ចបានឃាត់រថយន្តនេះឱ្យអ្នកបើកបរចូលមកសហការជាមួយសមត្ថកិច្ចត្រួតពិនិត្យជាតិស្រវឹង។
បន្ទាប់មកសមត្ថកិច្ចបានឃើញអ្នកបើកបរចុះមកសហការជាមួយសមត្ថកិច្ច ដោយសមត្ថកិច្ចនៅគោលដៅនោះមិនបានស្គាល់លោកបណ្ឌិត សុខ ទូច នោះទេនៅពេលនោះគាត់មានកាយវិកា និងពាក្យសម្តីមិនសមរម្យ មិនព្រមសហការផ្លុំរកជាតិអាល់កុល ហើយសមត្ថកិច្ចព្យាយាមណែនាំគាត់ឱ្យសហការត្រួតពិនិត្យជាតិអាល់កុល។ បន្ទាប់មកគាត់បានយល់ព្រមផ្លុំខ្យល់៤ទៅ៥ដង។ ប៉ុន្តែការផ្លុំខ្យល់នោះមិនដល់កម្រិតខ្យល់ដែលម៉ាស៊ីនចេញទិន្នន័យនោះទេ ហើយគាត់មិនព្រមសហការផ្លុំទៀត និងមានសកម្មភាពច្រងេងច្រងាងទាញកញ្ឆក់ម៉ាស៊ីនផ្លុំខ្យល់ពីដៃសមត្ថកិច្ច ដោយចោទថា ដាក់បំពង់ផ្លុំខ្យល់ចាស់ឱ្យគាត់ផ្លុំ ប៉ុន្តែសមត្ថកិច្ចបានពន្យល់ណែនាំគាត់ថា បំពង់ផ្លុំខ្យល់នេះ គឺផ្លុំ១ប្តូរបំពង់១ថ្មី មិនប្រើបំពង់ផ្លុំរួចហើយយកប្រើប្រាស់ទៀតនោះទេ រួចគាត់ក៏បែរជាចោទសមត្ថកិច្ចហៅគាត់ (អា) ទៅវិញ និងចោទថា ប្រើប្រាស់កាយវិកាមិនសមរម្យដាក់គាត់ទៀតផង ខណៈដែលសមត្ថកិច្ចស្នើសុំឱ្យគាត់សហការផ្លុំរកជាតិអាល់កុល។
បន្ទាប់មកគាត់ក៏បានរើយកអីវ៉ាន់ វ៉ាលី និងសម្ភារ ចេញពីក្នុងរថយន្តរួចហៅផាស់អេបជិះចេញទៅបាត់ដោយបន្សល់ទុករថយន្តនៅគោលដៅត្រួតពិនិត្យជាតិស្រវឹង បន្ទាប់សមត្ថកិច្ចយកទៅរក្សាទុក អធិការដ្ឋាននគរបាល ខណ្ឌសែនសុខ រង់ចាំអ្នកបើកបរចូលមកដោះស្រាយ។
ម្ចាស់ករណីលោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា ដែលមានឋានៈស្មើ រដ្ឋមន្ត្រី។ លោកបានសរសេររៀបរាប់ដំណើររឿងផ្លុំអាស់កុលនៅលើ ផេកហ្វេសប៊ុក ផ្ទាល់ខ្លួនថា « ក្រោយពីចុះស្រាវជ្រាវអស់រយ:ពេល៣ថ្ងៃ ដើរឡើងភ្នំផងបើកឡានផង មកដល់ ភ្នំពេញ យប់ទៅហើយ ប៉ុន្តែរីករាយណាស់បានទៅដល់ទីដៅដែលគ្រោងទុក និងបានណាត់អ្នកប្រវត្តិសាស្រ្តប្រជុំថ្ងៃស្អែក បន្ទាប់មកក៏បានចូលហូបបាយ និងបានហូបបីយ៉ែមួយកំប៉ុងប៉ុណ្ណោះដើម្បីរំសាយការហត់នឿយ ហូបរួចបានបើកឡានជូនមន្រ្តីដែលទៅជាមួយទៅយកម៉ូតូនៅកន្លែងធ្វើការទើបចេញដំណើរមកផ្ទះនៅ បាសិត នៅតាមផ្លូវមកផ្ទះបានជួប សមត្ថកិច្ចអនុវត្តច្បាប់ត្រួតពិនិត្យ ជាតិអាល់កុល ពួកគាត់ឃាត់ឡាន និងឱ្យខ្ញុំផ្លុំវាស់កម្រិតជាតិអាល់កុល ខ្ញុំបានចុះទៅសហការ តែខ្ញុំស្នើសុំហែកទុយោថ្មី ព្រោះខ្ញុំខ្លាចដដែលរបស់អ្នកចាស់ឆ្លងរោគ ផ្ទុយទៅវិញគេកំហកថា ហែងស្អីបានមកបញ្ជាកងកម្លាំង ខ្ញុំកំពុងតែហត់ នឿយ ផង ឮបែបនេះខ្ញុំទប់មិនជាប់ក៏ឆេវឆាវកើតជារឿង តែក្រោយមក ខ្ញុំសហការផ្លុំចំនួន៣ដង តែមិនឃើញកម្រិតជាតិអាល់កុលដែលគេចង់បាន គេថា ខ្ញុំផ្លុំមិនត្រឹមត្រូវ ឱ្យខ្ញុំផ្លុំម្តងទៀត តែក្រោយនេះខ្ញុំលែងសហការ ខ្ញុំក៏បាននិយាយថា បើខ្ញុំខុសចង់ដាក់ខ្នោះខ្ញុំដាក់ទៅ កាយវិកាច្រលោតព្រោះខ្ញុំខឹងណាស់ ហត់ណាស់ ខ្ញុំបានប្រាប់ថា ខ្ញុំ សុខ ទូច ទើបមកពីព្រំដែនទេតែគេចោទខ្ញុំថា ស្រវឹងជោគជាំ ប្រហែលឃើញភ្នែកខ្ញុំក្រហម ថ្ងៃនេះខ្ញុំដើរផង
ខ្ញុំបើកឡាន ដោយខ្លួនឯងជាង៦០០គីឡូម៉ែត្រ និងមានបញ្ហាភ្នែកស្ងួត លុបមុខញីភ្នែកជាច្រើនដង ហត់នឿយជាប់មិនមានបានសម្រាក »។
លោកបណ្ឌិត្យបន្តថា មានប៉ូលិស ដៀលខ្ញុំធ្វើដល់បណ្ឌិតចារិកអីចឹង ខ្ញុំជាពលរដ្ឋម្នាក់ បើខ្ញុំខុស ខ្ញុំទទួលទោស បើខ្ញុំមិនបានទទួលទានដល់កម្រិតដែលបង្កបញ្ហាផង តើឱ្យខ្ញុំផ្លុំរបៀបម៉េចទៀត ? គេថតខ្ញុំបាន តែពេលខ្ញុំឱ្យគ្រួសារខ្ញុំថតវិញ គេមិនឱ្យថតទេ។ ខ្ញុំបានទុកឡាននៅទីនោះ រួចដើរមកផ្ទះ គ្រួសារខ្ញុំហៅកង់បីជិះបានបន្តិច ទើបដឹងថា ផ្ទះខ្ញុំឆ្ងាយគេមិនដឹកទេ ក្រោយមកទើបមានកង់បីមួយទៀតព្រមដឹកមកផ្ទះ ព្រោះគេបានស្គាល់ខ្ញុំ មកដល់ផ្ទះគេសុំថតជាមួយខ្ញុំ។ ខ្ញុំថា មិនបង្ហោះទេ ប៉ុន្តែមកដល់ផ្ទះហើយដេកមិនលក់ ទើបរៀបរាប់ជាសាធារណ:បែបនេះ »។
នេះជាសកម្មភាពពេលដែលខ្ញុំ ( សុខ ទូច ) ច្រលោត ហើយក្រោយពេលហៅខ្ញុំ អាផង ហែងផង ( វីឌីអូនេះ មិន មែនជារបស់ខ្ញុំថតទេ គេផ្ញើមកក្រោយមានការបង្ហោះ) ខ្ញុំសូមយកមកចែកបន្ត។
មានវីដេអូ មួយទៀតដែលសមត្ថកិច្ចបាននាំគ្នាតាមឃាត់លោកបណ្ឌិត សុខ ទូច ខណៈរើអីវ៉ាន់ និងវ៉ាលី ចេញពីរថយន្តក្នុងគោលបំណងដើរចេញពីកន្លែងកើតហេតុក៏ត្រូវសមត្ថកិច្ចរុញច្រានលោកបណ្ឌិតយ៉ាងអាក្រក់មើលបំផុត។
ចំណែកលោក សយ សុភាព អ្នកកាសែតជើងចាស់បានលើកឡើងថា ទោះបីបងៗភ្នាក់ងារមានសមត្ថកិច្ចជំនាន់មុនមិនដែលមានអាកប្បកិរិយាបែបនេះដាក់អ្នកចេះដឹង ឬមន្ត្រីមានកិត្តិយស និងបណ្ឌិតបែបនេះដែរ។ ហេតុអ្វីពេលនេះបែរជាអីចឹងទៅវិញ ? សូមមេបញ្ជាការអង្គភាពគួរមានការណែនាំបុគ្គលជាសមត្ថកិច្ចឱ្យយល់ដឹងពីរបៀបរបបការងារ។
លោកបន្តថា សុំទោសខ្ញុំមិនចង់មានយោបល់ទេ តែលោកបណ្ឌិត សុខ ទូច ជាឥស្សរជនរបស់ជាតិមួយរូបដែលត្រូវគោរព ហើយលោកបណ្ឌិតជា ឧត្តមមន្ត្រីជាន់ខ្ពស់ ដែលឡាយព្រះហស្ដដោយ ព្រះរាជក្រិត្យតាមសំណើរបស់ប្រមុខរាជរដ្ឋាភិបាល។ ម៉្យាងនេះ មិនមែនជាបទលើ្មសព្រហ្មទណ្ឌទេ ត្រឹមតែជាបទល្មើសលហុ។ សូមមេបញ្ជាការ នៃស្ថាប័នមានសមត្ថកិច្ចផ្ទាល់មេត្តាពិនិត្យឡើងវិញ និងកែសម្រួលរបៀបរបបការងារ។ គួររៀនសូត្រតាមរៀមច្បង…។
រីឯលោកបណ្ឌិត គិន ភា វិញក៏បានឱ្យដឹងថា « ល្មមដល់ពេលវេលាដែលត្រូវព្យាបាលដំបៅសង្គមនេះហើយ ! បញ្ហាសង្គមយើងបច្ចុប្បន្នប្រៀបដូចជាដំបៅដែលកើតនៅលើសារពាង្គកាយយើង គឺនៅកើតលើអវៈយាវៈ និងដងខ្លួនទាំងមូល។ បើមិនព្រមព្យាបាលដំបៅសង្គមនេះទេ ថ្ងៃណាមួយរាងកាយទាំងមូលនឹងស្លាប់។ កុំមើលងាយកមរមាស់ បើវាកើតពេញដងខ្លួនក៏វារំខានអ្នកមិនអាចសម្រាកបានដែរ នោះមិនទាន់គិតដល់ « ដំបៅងារ » ដែលមានជាច្រើនកន្លែងផង។
លោកបណ្ឌិតបន្តទៀតថា សូម្បីបណ្ឌិតសភាចារ្យ សុខ ទូច ពួកគេមិនមានការគួរសមផង ចុះទម្រាំងប្រជាពលរដ្ឋធម្មតាតើឥរិយាបទពួកគេបែបណា ? ដើម្បីប្រកែកយកឈ្នះ ស្នងការដ្ឋាននគរបាល រាជធានីភ្នំពេញ បង្ហោះសក ម្មភាពកន្លែងកើតហេតុដោយ គ្មានក្រមសីលធម៌ ហើយបង្ហោះតែមួយកំណាត់ដែលគិតថា ខ្លួនមានប្រៀប។
សកម្មភាពរបស់នគរបាលចរាចរបែបនេះលោកបណ្ឌិត គិន ភា ចាត់ទុកថា « មិនបង្ហាញពីការអនុវត្ត ក្រមសីលធម៌ សីលធម៌ និងវិជ្ជាជីវៈទេ។ ពួកអស់លោកកំពុងតែរុញឱ្យ រាជរដ្ឋាភិបាលបាក់មុខ ក្រសួងមហាផ្ទៃបាក់មុខ អគ្គស្នងការដ្ឋាននគរបាលជាតិ បាត់មុខ ហើយ។ សូមអស់លោកទៅសម្ភាសប្រជាពលរដ្ឋទៅ…មានប៉ុន្មានភាគ រយដែលគិតថា នគរបាលចរាចរបំពេញការងារប្រកបដោយវិជ្ជាជីវៈ និងក្រមសីលធម៌នោះ ? សូមកុំរុញឱ្យខ្លោច រោចឱ្យឆៅ »។
យោងតាមព័ត៌មានពីមន្ត្រីប៉ូលិសម្នាក់បានប្រាប់ឱ្យដឹងនាល្ងាចថ្ងៃទី១៨ ខែកុម្ភៈ ឆ្នាំ២០២៥ ថា ក្រុមនគរបាលពាក់ព័ន្ធទាំងនោះត្រូវបានកោះហៅមកដល់ ស្នងការដ្ឋាននគរបាល ភ្នំពេញ រួចហើយ។ ពួកគេអាចជាប់វិន័យកងកម្លាំងនគរបាលហើយអ្នកដែលបានរុញច្រានលោកបណ្ឌិត សុខ ទូច អាចនឹងត្រូវបណ្ដេញចេញពីក្របខណ្ឌក៏ថាបាន។ ពីព្រោះពួកគេត្រូវថ្នាក់ដឹកនាំធ្វើការអប់រំណែនាំស្ទើររាល់ថ្ងៃដូចជា ការនិយាយស្ដី និងកាយវិកាត្រូវ មានសីលធម៌ល្អ មានវិជ្ជាជីវៈ ប៉ុន្តែពួកគេមិនស្ដាប់ទាល់តែសោះ៕
