ដោយៈ អធិបតី
មណ្ឌលគិរីៈ រថយន្តប្រភេទឡិចស៊ិស៤៧០ (lexus៤៧០) មួយគ្រឿងបានធ្វើសកម្មភាពដឹកជញ្ជូនឈើខុសច្បាប់ជារៀងរាល់ថ្ងៃខែមកហើយចេញពី តំបន់អភិរក្សដែនជម្រកសត្វព្រៃមេម៉ង់ មកទម្លាក់នៅកណ្តាល ក្រុងសែនមនោរម្យ ខែត្រមណ្ឌលគិរី ដោយគ្មានមន្ត្រីស្ថាប័នជំនាញណាហ៊ានចេញមុខបង្ក្រាបឡើយ។
ប្រភពរាយការណ៍ចេញពី ខែត្រមណ្ឌលគិរី នៅព្រឹកថ្ងៃទី៣០ ខែឧសភា ឆ្នាំ២០២៤ ថា រថយន្ត Lexus៤៧០ មួយគ្រឿងនេះជារបស់លោក ធឹម សៀងហៃ ហៅ ឆាយ ដ៏មានអំណាច និងមានប្រវត្តិល្បីល្បាញត្រូវគេលុបឈ្មោះចេញពី មន្ត្រីអគ្គិសនីខែត្រ បានធ្វើសកម្មភាពដឹកឈើខុសច្បាប់យ៉ាងចំហតាំងពីមុនចូលឆ្នាំខ្មែររហូតដល់ពេលនេះ ហើយល្បីល្បាញថា អាងខ្នងអ្នកមានអំណាចជាមន្ត្រីធំម្នាក់នៅក្នុង ខែត្រមណ្ឌលគិរី ទើបគ្មានមន្ត្រីស្ថាប័នជំនាញពាក់ព័ន្ធណាហ៊ានក្អក ឬប៉ះពាល់គេឡើយ។
ប្រភពព័ត៌មានឲ្យដឹងទៀតថា រថយន្តម៉ាកឡិចស៊ិស៤៧០នេះពាក់ស្លាកលេខ ភ្នំពេញ 2AB -៤១២៦ បានធ្វើ សកម្មភាពដឹកឈើជញ្ជូឈើខុសច្បាប់ឆ្លងកាត់តាមផ្លូវពូត្រុំក្នុងមួយថ្ងៃពីរដង និងពេលខ្លះឈានដល់បីដងក៍មានហើយដឹកស្ទើរតែពេញពីមួយខែទៅមួយខែ។ ប្រភពបានឲ្យដឹងថា សូម្បីតែនៅក្នុងឱកាសពិធីបុណ្យចូលឆ្នាំប្រពៃណីជាតិខ្មែរកាលពីខែមុននោះក៍រថយន្តមួយគ្រឿងនេះមិនឈប់សម្រាកដែរ ពោលគឺបន្តដឹកឈើខុសច្បាប់ជារៀងរាល់ថ្ងៃ។ រីឯមន្ត្រីមានសមត្ថកិច្ចនៅតាមដងផ្លូវស្អេកស្កះជាពិសេសស្ថាប័នជំនាញពាក់ព័ន្ធទំនង ជាបានត្រឹមតែអង្គុយសម្លក់ចាំលូកដៃទទួលយកលាភសក្ការៈពីឈ្មួញម្នាក់នេះជារៀងរាល់ថ្ងៃតែប៉ុណ្ណោះ។
ករណីខាងលើនេះគេមិនដឹងថា អភិបាល ខែត្រមណ្ឌលគិរី លោក ថង សាវុន ដែលធ្លាប់តែចេញបទបញ្ជាយ៉ាងម៉ឹងមាត់ក្នុងអង្គប្រជុំ គណៈបញ្ជាការខែត្រ ឲ្យមន្ត្រីជំនាញពាក់ព័ន្ធក្នុងខែត្រទាំងមូលបង្ក្រាបបទល្មើសនានាជាពិសេសបទល្មើសព្រៃឈើខុសច្បាប់ បានដឹងពីសកម្មភាពដឹកជញ្ជូនឈើខុសច្បាប់ជារាល់ថ្ងៃចេញពី តំបន់អភិរក្សសត្វព្រៃមេម៉ង់ របស់មេឈ្មួញល្បីឈ្មោះខាងលើដែរឬទេ? ចាំមើលថា រដ្ឋបាល ខែត្រមណ្ឌលគិរី ដឹកនាំដោយលោក ថង សាវុន គណៈបញ្ជាការខែត្រ ហ៊ានប្រើកណ្តាប់ដៃដែកបង្រ្កាបមេឈ្មួញទុច្ចរិតរកស៊ីឈើខុសច្បាប់ឈ្មោះ បងឆាយៗ នេះបានដែរឬទេ ?
កន្លងមកសកម្មភាពការដឹកជញ្ជូនឈើរបស់ឈ្មួញម្នាក់នេះត្រូវគេអះអាងថា គ្មាននរណាហ៊ានក្បែរនោឡើយ។ ពីព្រោះលោកមានអំណាច និងខ្សែរយៈធំខ្លាំងណាស់។ បុរសដែលមានឥទ្ធិពល និងអំណាចខ្លាំងដឹកឈើជាន់ផ្អៀង ខែត្រមណ្ឌលគិរី សព្វថ្ងៃនេះមានឈ្មោះហៅក្រៅថា បងឆាយៗ។ គាត់ត្រូវបានគេស្គាល់ថា អតីតជាមន្ត្រីបម្រើការងារនៅ អគ្គិសនី ខែត្រមណ្ឌលគិរី ដែលត្រូវគេបណ្ដេញចេញ។ បើទោះបីជាគាត់ដឹកឈើទាំងថ្ងៃក៍គ្មាននរណាហ៊ានសួរនាំ ឬហ៊ានដើរក្បែររថយន្តឡិចស៊ិស៤៧០ នោះដែរ។
ប្រជាពលរដ្ឋរាយការណ៍ថា វាជារថយន្តដឹកបទល្មើសព្រៃឈើចេញពី តំបន់អភិរក្សសត្វព្រៃមេម៉ង់ ឆ្ពោះមកកាន់ ក្រុងសែនមនោរម្យ ដោយយកទៅទម្លាក់នៅម្តុំខាងក្រោយ វត្តលើ ក្នុងបរិវេណទីតាំងផ្ទះមួយកន្លែងស្ថិតក្នុង ភូមិពូត្រុំ សង្កាត់មនោរម្យ។ ការដឹកជញ្ជូនឈើត្រូវបានរឹតបន្តឹងនៅក្នុង ខែត្រមណ្ឌលគិរី។ ប៉ុន្តែសម្រាប់រថយន្តមួយគ្រឿងនេះត្រូវគេប្រាប់ថា គ្មានសមត្ថកិច្ចណាហ៊ានប៉ះពាល់ឡើយដោយសារតែគេយកស្បែកខ្លានៅ ស្ថាប័នយុត្តិធម៌ មកប្រើបាំងពាសពីខាងក្រៅ។ នេះគឺជាអំណាច និងឥទ្ធិពលរបស់លោក ឆាយ ដែលគេអះអាងថា គ្មាននរណាហ៊ានក្អកនោះទេ។ ជារឿយៗលោក ឆាយ មានវត្តមាននៅទីតាំងផឹកស៊ីជាមួយអ្នកកាងឈើទៀតផង។
ទោះយ៉ាងណាក៍ដោយគេរំពឹងថា គណៈកម្មការជាតិបង្ក្រាបបទល្មើសធនធានធម្មជាតិ នាយឧត្តមសេនីយ៍ សៅ សុខា ក៍ដូចជាអភិបាលខែត្រមណ្ឌលគិរី លោក ថង សាវុន នឹងពិនិត្យស្រាវជ្រាវមើលករណីបទល្មើសព្រៃឈើរបស់បុរសឈ្មោះ ធឹម សៀងហៃ ហៅ ឆាយ នេះផងដើម្បីឈានដល់ការបង្ក្រាបពិតៗ។ ពីព្រោះបើអាងទៅលើសមត្ថភាពមន្ត្រីជំនាញពាក់ព័ន្ទនៅតាមដងផ្លូវពី មេម៉ង់ មក ក្រុងសែនមនោរម្យ គឺគ្មាននរណាហ៊ានក្អកជាមួយលោក ធឹម សៀងហៃ (ឆាយ) នោះទេ។ មិនហ៊ានក្អកក៍ព្រោះតែទំនងបានទទួលលាភសក្ការៈបន្តិចបន្តួចរួមជាមួយ និងការគំរាមកំហែងរបស់លោក ឆាយ នោះផងដែរក៍ថាបាន៕
