ភ្នំពេញៈ ជម្លោះវាស់ជាតិអាល់កុលមិនបានសម្រេច រវាងលោកបណ្ឌិតសភាចារ្យ សុខ ទូច និងក្រុមមន្ត្រីនគរបាលចុះអនុវត្តច្បាប់ចរាចរផ្លូវគោកនោះត្រូវបានសម្ដេចតេជោ ហ៊ុន សែន ប្រធានព្រឹទ្ធសភា ចេញមកផ្សះផ្សាថា សូមកុំនាំគ្នាថែមអំបិលប្រហុកទឹកត្រីប៊ីចេង និងកុំថែមសាំងទៅលើភ្លើង។ ពីព្រោះរឿងនេះវាកំពុងតែពុះកញ្ជ្រោលយ៉ាងខ្លាំងក្នុងបណ្ដាញសង្គមហ្វេសប៊ុក។ សម្ដេចមានប្រសាសន៍យ៉ាងដូច្នេះនៅលើ ផេកផ្លូវការ នាព្រឹកថ្ងៃទី១៩ ខែកុម្ភៈ ឆ្នាំ២០២៥។
កាលពីយប់ថ្ងៃទី១៧ ខែកុម្ភៈ ឆ្នាំ២០២៥ នៅតាមបណ្ដោយផ្លូវហាណូយ ខណ្ឌសែនសុខ ប៉ូលិសខណ្ឌ និងស្នងការក្រុង ចុះអនុវត្តច្បាប់ចរាចរផ្លូវគោករកគ្រឿងស្រវឹង ក៏បានកើតជម្លោះគ្នារុញច្រាន លោកបណ្ឌិតសភាចារ្យ សុខ ទូច ចង់ផ្កាប់មុខហើយអ្នកខ្លះបានហៅលោកបណ្ឌិតថា អា អ្ហែង និងបានតិះដៀលថែមទៀតផងធ្វើឱ្យលោកបណ្ឌិតច្រឡោតខឹង។ រឿងនេះមានវីដេអូមួយបង្ហាញថា ប៉ូលិសបាននាំគ្នាចោមរោមព័ទ្ធរុញច្រានលោកបណ្ឌិតយ៉ាងអា ក្រក់មើលអសីធម៌ជាទីបំផុតខណៈលោកបណ្ឌិតមានងារស័ក្ដិយសស្មើ « រដ្ឋមន្ត្រី »។
សម្ដេចតេជោ ហ៊ុន សែន មានប្រសាសន៍នៅផេកផ្លូវការ នាព្រឹកថ្ងៃទី១៩ ខែកុម្ភៈ ថា ករណីបណ្ឌិត សុខ ទូច ជាមួយនគរបាលចរាចរណ៍ បានក្លាយជាអាជីវកម្មដោយមិនដឹងខ្លួន។ អ្នកមិនចូលចិត្តបណ្ឌិត សុខ ទូច បាន ថែមអំបិល ប្រហុក ដើម្បីទាញទម្លាក់បណ្ឌិត សុខ ទូច។ ឯអ្នកមិនចូលចិត្ត នគរបាលចរាចរណ៍ ក៏ប្រឹងថែមទឹកត្រី និងប៊ីចេង ដើម្បីវាយប្រហារនគរ បាលចរាចរណ៍។ តើអ្នកណាជាអ្នកទទួលផលចំណេញលើហេតុការណ៍នេះ ? គ្មានអ្នកណាចំណេញនោះឡើយ តែផ្ទុយទៅវិញគឺខាតទាំងអស់គ្នា។
សម្ដេចប្រធានព្រឹទ្ធសភា បន្ដទៀតថា « ខ្ញុំសូមបងប្អូនជនរួមជាតិ ក៏ដូចជាអ្នកពាក់ព័ន្ធ សូមបញ្ចប់រឿងនេះ ត្រឹមនេះតាមរបៀប ឈ្នះ ឈ្នះ និងសហការគ្នាបន្តការងាររៀងៗខ្លួន។ សង្ឃឹមថាអ្នកថែមអំបិលប្រហុកទឹកត្រី ប៊ីចេងបញ្ឈប់ថែមសាំងចាក់លើភ្លើង រាប់ទាំងអ្នកផ្តល់សារមកខ្ញុំវាយប្រហារម្ខាងៗ។ បើលុបសារនោះចោលខ្លួនឯងជាការល្អ ព្រោះខ្ញុំបានមើលរួចហើយ »។
ចំណែកអតីតរដ្ឋមន្ត្រី ក្រសួងព័ត៌មាន និងជាអ្នកតំណាងរាស្ត្រកំពង់ចាម លោក ខៀវ កាញារីទ្ធ បានលើកឡើង ថា រូបភាពវីដេអូនាយប់ថ្ងៃទី១៧ ខែកុម្ភ: ឆ្នាំ២០២៥ ដែលបង្ហាញពីសកម្មភាពដ៏អន់បំផុតរបស់មន្រ្តីនគរបាលរុញ ឯកឧត្តម សុខ ទូចស្ទើរចង់ផ្កាប់មុខ ពលរដ្ឋបានឆ្ងល់ហើយសួរថា តើទង្វើបែបនេះស័ក្ដិសមជា មន្រ្តីនគរបាលអនុវត្តច្បាប់ដែរឬទេ ?
ដោយមើលឃើញពី ទង្វើអសីធម៌ នៃក្រុមប៉ូលិសបានរុញច្រានលោកបណ្ឌិតសភាចារ្យ សុខ ទូច ស្ទើរផ្កាប់មុខធ្វើឱ្យអ្នកវិភាគសង្គម លោកបណ្ឌិត គិន ភា បញ្ជាក់ពីអារម្មណ៍ពិតថា « នៅពេលឃើញវីដេអូឃ្លីបទី២ ខ្ញុំកាន់តែខ្លោចចិត្ត ខ្លោចចិត្តនឹងលោកគ្រូផង ខ្លោចនឹងសង្គមយើងផង ដែលបានដើរមកដល់ចំណុចនេះផង។ ឥរិយាបថរបស់ពួកគេទៅលើ លោកគ្រូបណ្ឌិតសភាចារ្យ សុខ ទូច ប្រៀបដូចសត្វតោដ៏សាហាវ ព័ទ្ធស៊ីកូនម្រឹគ។ គួរឱ្យ អណោច អធ័មណាស់ ដែលជាតិយើងបានដើរមកដល់ចំណុចនេះ។ នេះក៏ដោយសារតែ កន្លងមកយើងចាត់ទុករឿងនេះ ជា កមរមាស់ ធម្មតាតែតាមពិតវាជាជំងឺមហារីកសង្គមដ៏គួរឱ្យខ្លាចណាស់ »។
តាមរយៈនេះលោកបណ្ឌិត គិន ភា ចាត់ទុកថា « បើមិនអប់រំសីលធម៌ និងមកសិការវិជ្ជាជីវៈដល់ពួកគេឱ្យបានត្រឹមត្រូវទេ ប្រជាពលរដ្ឋច្រើនសែននាក់ទៀតនឹងជួបស្ថានភាពបែបនេះទៀត។ ពេលនោះប្រជាពលរដ្ឋក៏លែងទទួលយកសង្គមបែបនេះបានទៀតដែរ »៕
