លោក វ៉ី សំណាង អភិបាល ខែត្រតាកែវ បានដឹកនាំកម្លាំងចម្រុះមាន ស្នងការនគរបាលខែត្រ កងរាជអាវុធហត្ថខែត្រ តំបន់ប្រតិបត្តិការសឹករងខែត្រ និងគណៈបញ្ជាការឯកភាពរដ្ឋបាល ស្រុកគិរីវង់ ចុះទៅដល់កន្លែងទីតាំងដាំកញ្ឆាដោយផ្ទាល់ហើយបានកាប់ដុតបំផ្លាញដើមកញ្ឆាស្រស់ចោលនៅលើភ្នំនោះតែម្ដង។ នេះជាលើកទីមួយក្នុងប្រវត្តិសាស្ត្រថ្នាក់ដឹកនាំ ខែត្រតាកែវ។
ដំណាំកញ្ឆានេះគេនាំគ្នាលួចដាំដុះនៅក្នុង តំបន់ជួរភ្នំបាយ៉ង់ កើតមានឡើងជាយូរឆ្នាំមកហើយ។ ពលរដ្ឋខ្លះរស់និងមានបានដោយសារដំណាំកញ្ឆាលួចលាក់ដែលផលិតបានលួចនាំចេញទៅលក់ឱ្យយួនក្នុង១គីឡូក្រាមមានតម្លៃ៨០ ម៉ឺនរៀលក្នុងរដូវវស្សា រីឯនៅក្នុងរដូវប្រាំងវិញកញ្ឆាក្រៀមក្នុង១គីឡូក្រាមមានតម្លៃ១លានរៀលគឺស្មើ២៥០ដុល្លារ។ ទាំងនេះគឺជាការអះអាងរបស់អ្នកស្រុករស់នៅទីនោះផ្ទាល់។ ដោយសារការធ្វើស្រែស្រូវពុំសូវបានផលបុគ្គលមួយចំនួនក៏បែកគំនិតលួចដាំកញ្ឆាលក់ទៅឱ្យយួនតាមច្រករបៀងព្រំដែន។
បើយោងតាមអ្នក ស្រុកគិរីវង់ បានប្រាប់ បាយ៉ង់ថាមស៍ នៅរសៀលថ្ងៃទី២ ខែកុម្ភៈ ឆ្នាំ២០២៥ ថា ករណីនេះគេថា ខ្មោចស្រុកមិនឱ្យដៃ ខ្មោចព្រៃក៏វាមិនហ៊ានដែរ។ ដូច្នេះអ្នកលួចដាំកញ្ឆានៅក្នុងតំបន់នោះអាជ្ញាធរភូមិសុទ្ធតែបានដឹងមុខសញ្ញា និងស្គាល់ពួកគេយ៉ាងច្បាស់លាស់ថែមទៀតផង។ ហេតុអ្វីអាជ្ញាធរមិនព្រមចាប់អ្នកលួចដាំកញ្ឆាទាំងនោះយកទៅអនុវត្តទោសតាមទៅច្បាប់ ?
ពួកគាត់បន្តទៀតថា បើអាជ្ញាធរខែត្រជ្រុលធ្វើទៅហើយ…គួរតែធ្វើឱ្យបានដល់ឫសគល់ គឺជីកស្មៅត្រូវជីកទាំង ឫស។ យើងនាំគ្នាពន្លត់ភ្លើងវាប្រសើរជាងនាំគ្នាអង្គុយបក់ផ្សែង។ ដូច្នេះដើម្បីកុំឱ្យកើតមានអ្នកលួចដាំកញ្ឆានេះ បានតទៅទៀតរដ្ឋគួរតែបើកការស៊ើបអង្គេតរកមុខសញ្ញាចាប់ពួកគេដាក់គុកដោយគ្មានការយោគយល់ក្រោម លេសធ្វើស្រែប្រាំងមិនបានផល…។
លោក វ៉ី សំណាង អភិបាល ខែត្រតាកែវ បានប្រាប់ បាយ៉ង់ថាមស៍ នៅល្ងាចថ្ងៃទី២ ខែកុម្ភៈ ឆ្នាំ២០២៥ ថា យើងមិនឈប់ត្រឹមហ្នឹងទេ។ យើងត្រូវបន្តរកអ្នកដែលនៅពីក្រោយខ្នង…។ លោកសូមអំពាវនាវទៅប្រជាពលរដ្ឋសូមកុំដាំអាហ្នឹង (កញ្ឆា) វាមិនមែនជារុក្ខជាតិច្បាប់គាំទ្រនោះទេ។ លោកបន្តទៀតថា « អ្នកដែលប្រព្រត្តិ គឺមិនអាច ចៀសផុតពីការផ្តន្ទាទោសផ្លូវតុលាការនោះទេ…»។
ចំណែកលោក ឡុង សារ៉ន មេឃុំព្រះបាទជាន់ជុំ ស្រុកគិរីវង់ ក៏បានចូលរួមសហការក្នុងការកាប់បំផ្លាញដំណាំកញ្ឆាទាំងនោះដែរ។ ក្នុងនាមលោកជាអាជ្ញាធរដែនដីគឺពុំបានឃើញកម្លាំងចម្រុះចាប់ខ្លួនអ្នកលួចដាំកញ្ឆាណាម្នាក់នោះទេ។
គួរបញ្ជាក់ថា លោក វ៉ី សំណាង ចាប់តាំងពីចូលកាន់តំណែងជា អភិបាល ខែត្រតាកែវ មកបានលុបបំបាត់ ការដាក់តាំងស្លាកសញ្ញាស្រាបៀ (គ្រឿងស្រវឹង) នៅតាមទីសាធារណៈបានជោគជ័យដូចកាលលោកនៅជា អភិបាល ខែត្រកំពង់ស្ពឺ អីចឹងដែរ។ កញ្ឆា ឈ្មោះដំណាំមួយប្រភេទ មានស្លឹកសម្រាប់ហាន់ជក់លាយនឹងថ្នាំ ជក់ទៅស្រវឹងនាំឱ្យងេងងោង វង្វេង ( មាន មាត្រា ៤០០ និងមាត្រា ៤០១ នៃក្រមព្រហ្មទណ្ឌខ្មែរហាមឱ្យដាំ មិនឱ្យជក់ ) ៕
