បាយ៉ង់ថែមស៍
Booking.com

កម្ពស់ទឹកទន្លេខេត្តរតនគិរីជិតដល់កម្រិតប្រកាសអាសន្ន ពលរដ្ឋដែលរស់នៅតាមដងទន្លេត្រូវមានការប្រុងប្រយ័ត្ន

ខែត្ររតនគិរី៖បន្ទាប់ពីមានភ្លៀងធ្លាក់ជាប់ៗគ្នាទូទាំងខេត្តរតនគិរីជាច្រើនថ្ងៃកន្លងមកធ្វើឲ្យទឹកទន្លេបឹងបួរហក់ឡើងជាលំដាប់ជិតដល់កម្រិតប្រកាសអាសន្នឱ្យគណៈកម្មាការគ្រប់គ្រងគ្រោះមហន្តរាយខេត្តបានចេញសេចក្ដីជូនដំណឹង ដល់អាជ្ញាធរមូលដ្ឋានព្រមទាំងប្រជាពលរដ្ឋដែលរស់នៅតាមដងទន្លេ បឹងបួរ អូរ ព្រែក ប្រឡាយ អាចងាយរងគ្រោះប៉ះពាល់ពីទឹកជំនន់ទឹកភ្លៀងសូមមេត្តាត្រៀមលក្ខណៈប្រុងប្រយ័ត្នឲ្យបានខ្ពស់ ។





 ការជូនដំណឹងរបស់អាជ្ញាធរខេត្តនេះធ្វើឡើងកាលពីថ្ងៃទី១៦ ខែកក្កដា ឆ្នាំ២០១៨ កន្លងទៅបន្ទាប់ពី ខេត្តរតនគិរី ត្រូវគ្របដណ្ដប់ដោយភ្លៀងរលឹមជាប់ៗគ្នាអស់រយៈពេល១១ថ្ងៃមកហើយបើគិតមកដល់ថ្ងៃទី១៨ ខែកក្កដា នេះ ។ ចំណែកផលដំណាំរបស់ប្រជាពលរដ្ឋ នៅមិនទាន់មានផលប៉ះពាល់ឡើយ ក៏ប៉ុន្តែទឹកទន្លេសេសាន និង ទន្លេស្រែពក ជិតដល់កម្រិតប្រកាសអាសន្នហើយ ។

 លោក ចាន់ ប៊ុនធឿន ប្រធានមន្ទីរធនធានទឹកនិងឧតុនិយម ខេត្តរតនគិរី បានឲ្យដឹងនៅថ្ងៃទី១៨ ខែកក្កដា នេះថា សីតុណ្ហភាពមានកម្រិតពី២៦អង្សាសេទៅ២១អង្សាសេ ។ ចំណែក ទន្លេស្រែពក មានកម្ពស់ទឹក៧.៨៦ម៉ែត្រ ក្នុងនោះកម្រិតប្រកាសអាសន្ន១២.០០ម៉ែត្រហើយទន្លេសេសានមានកម្ពស់ទឹក៦.១០ម៉ែត្រដែលមានកម្រិតកម្ពស់ទឹកប្រកាសអាសន្ន៨.០០ម៉ែត្រ។

 បើទោះជាកម្ពស់ទឹកទន្លេនៅមិនទាន់ដល់កម្រិតប្រកាសអាសន្នយ៉ាងណាក៏ដោយគណៈកម្មាធិការគ្រប់គ្រងគ្រោះមហន្តរាយ ខេត្តរតនគិរី សូមឲ្យបងប្អូនប្រជាពលរដ្ឋមានការប្រុងប្រយ័ត្នខ្ពស់ជាប្រចាំដើម្បីចៀសវាងនូវគ្រោះថ្នាក់ដែលអាចកើតមានឡើងជាយថាហេតុ។ សូមគ្រប់អាជ្ញាធរមូលដ្ឋានយកចិត្តទុកដាក់តាមដានសភាពការណ៍ឲ្យខ្ជាប់ខ្ជួននិងត្រៀមលក្ខណៈក្នុងការជួយសង្គ្រោះបន្ទាន់ជូនពលរដ្ឋក្នុងករណីគ្រោះអាសន្នកើតមានឡើង ៕


សូមជួយចែករំលែក


Booking.com
Booking.com
Booking.com
Footer Menu