លោកគ្រូ ជ្រឹម ដារិន ជាគ្រូបង្រៀន មុខវិជ្ជាឯកទេសភាសាអង់គ្លេស និងភាសាខ្មែរ នៃវិទ្យាល័យ ប៊ុន រ៉ានី ហ៊ុន សែន ដងទង់។ លោកគ្រូត្រូវបាន លោក សំ យ៉ុន នាយកសាលា ដាក់សំណើសុំផ្លាស់ប្ដូរ ដោយមូលហេតុអវត្តមានច្រើន និងមិនព្រមទៅចុះវត្តមានរួមជាមួយនឹងលោកគ្រូអ្នកគ្រូដទៃទៀតដែលគេសំអាងថា ទៅបង្រៀនដោយមិនស៊ីញេវត្តមានស្មើនឹងមិនបង្រៀនសិស្ស។
រឿងវិវាទរវាង នាយកសាលា និងគ្រូបង្រៀន ជាធម្មតាគេតែងចែងច្បាប់ នៃការគ្រប់គ្រង មន្ត្រីរាជការ ទៅតាមស្ថាប័ននីមួយៗ ដូច្នេះពេលមានវិវាទកើតឡើងគេត្រូវមាន ប្រធានអង្គភាពស្ថាប័ន ដើម្បីធ្វើការដោះស្រាយជូនភាគីវិវាទទាំងនោះបានជា ប្រធាន មន្ទីរអប់រំយុវជន និងកីឡា ខែត្រកំពត ចេញលិខិតបង្គាប់ការផ្លាស់ប្ដូរដោយបង្ខំដោយមិនបានសួរនាំពីភាគីវិវាទទាំងសងខាង ? បែរជាសម្រេចចិត្តចេញ លិខិតផ្លាស់ប្ដូរទាំងបង្ខំ ចំពោះលោកគ្រូបង្រៀនម្នាក់ដែលបង្រៀននៅ វិទ្យាល័យ ប៊ុន រ៉ានី ហ៊ុន សែន ដងទង់ ឲ្យទៅបង្រៀននៅ អនុវិទ្យាល័យដំណាក់ត្រយឹង។ តើការធ្វើនេះត្រឹមត្រូវ និងស្របតាមគោលការណ៍នីតិវិធីច្បាប់របស់ ក្រសួងអប់រំ ដែរឬទេ ?
លោកគ្រូ ជ្រឹម ដារិន កំពុងអានសៀវភៅ !
លោកគ្រូ ជ្រឹម ដារិន បានបញ្ជាក់ប្រាប់ បាយ៉ង់ថាមស៍ នៅរសៀលថ្ងៃទី២២ ខែមីនា ឆ្នាំ២០២៥ នេះថា លោកមិនបដិសេធចំពោះការផ្លាស់ប្ដូររបស់ លោកប្រធានមន្ទីរអប់រំយុវជន និងកីឡា ខែត្រកំពត នោះទេ។ គ្រូបង្រៀនដែលចូលចិត្តអានសៀវភៅរូបនោះបានរៀបរាប់ទាំងក្តុកក្តួលចិត្តព្រោះអាណិតសិស្សរបស់គាត់ថា អ្វីដែលលោកគ្រូមិនសប្បាយចិត្តនោះ គឺការអនុវត្តច្បាប់មិនស្មើភាពគ្នា។ នៅ វិទ្យាល័យ ប៊ុន រ៉ានី ហ៊ុន សែន ដងទង់ មានគ្រូបង្រៀនផ្សេងៗទៀតដែលមួយឆ្នាំមកបង្រៀនបានត្រឹមតែ២ម៉ោងប៉ុណ្ណោះ។ ប៉ុន្តែបែរជា លោកនាយកសាលា មិនបានធ្វើរបាយការណ៍ជូនមកមន្ទីរអប់រំខែត្រដើម្បីធ្វើការផ្លាស់ប្ដូរដោយបង្ខំនោះទេ ដែលធ្វើឱ្យគេសង្ស័យថា ជាបក្ខពួករបស់គាត់ក៏មិនដឹង ?
ម្យ៉ាងទៀតរឿងនេះមុននឹងផ្លាស់ប្ដូរគ្រូណាម្នាក់គួរប្រាប់គាត់មុន ឬហៅទៅសួរនាំអំពីមូលហេតុជាមុនសិន។ លោកគ្រូបន្តទៀតថា លោកមានការសោកស្ដាយចំពោះឆន្ទៈរបស់អាណាព្យាបាលសិស្ស និងឆន្ទៈរបស់សិស្សានុសិស្ស ដែលលោកបានបង្រៀនពុំចង់ឲ្យលោកចាកចេញទៅសាលាផ្សេងនោះទេ។
លោកបន្ថែមទៀតថា គេផ្ទេរខ្ញុំដោយបង្ខំនេះ ប្រហែលមកពីមូលហេតុខ្ញុំធ្លាប់សំណូមពរច្រើនជុំវិញនឹងការអភិវឌ្ឍ ន៍សាលារៀន និងមានការរិះគន់ដើម្បីស្ថាបនារាល់ការចាយវាយថវិកាជាតិនៅក្នុងវិទ្យាល័យនោះក៏អាចថាបាន ?
លោកបានបញ្ជាក់ទៀតថា សាលារៀនថ្មីដែលលោកគ្រូទៅបង្រៀនសិស្សនោះទាំង នាយក នាយករង បុគ្គលិក និងសិស្សានុសិស្ស ពួកគាត់បានអបអរសាទរចំពោះវត្តមានរបស់លោកគ្រូ ដារិន។ ជាងនេះទៅទៀតមានបងប្រុសម្នាក់ ដែលធ្លាប់រាប់អានគ្នាដោយការគោរពស្រឡាញ់ និងគាំទ្រលោកគ្រូ ដារិន បានជួយឧបត្ថម្ភទឹកសុទ្ធចំនួន ៥០យួរក្នុងមួយខែសម្រាប់សាលាថ្មីដែលលោកគ្រូទៅបំពេញការងារនោះគឺ អនុវិទ្យាល័យដំណាក់ត្រយឹង។
លោកក៏បានអរគុណដល់ មន្ទីរអប់រំ ក៏ដូចជា ក្រសួងអប់រំយុវជន និងកីឡា ដែលបានផ្ដល់ការងារឲ្យគាត់។ គាត់បានប្ដេជ្ញាចិត្តថា នឹងទៅធ្វើការនៅកន្លែងថ្មីដែល មន្ទីរអប់រំ ខែត្រកំពត ដាក់ឲ្យនោះឲ្យបានល្អប្រសើរ។
ប្រធាន មន្ទីរអប់រំយុវជន និងកីឡា ខែត្រកំពត លោក សូ ភារិទ្ធ នៅរសៀលថ្ងៃទី២២ ខែមីនា ឆ្នាំ២០២៥ ទូរស័ព្ទ ហៅចូលតែលោកពុំទទួលនោះទេ។ ក៏ប៉ុន្តែលោកបានសរសេរសារឆ្លើយបតតាមរយៈ តេឡេក្រាម យ៉ាងខ្លីថា សាយណ្ណសួស្ដី !។ ចំណែក នាយកសាលា លោក សំ យ៉ុន វិញអង្គភាពយើងក៏ពុំអាចទាក់ទងសុំការបំភ្លឺបានដែរជុំវិញករណីខាងលើនេះ។
គួររំលឹកថា លោក សំ យ៉ុន នាយកវិទ្យាល័យ ប៊ុន រ៉ានី ហ៊ុន សែន ដងទង់ ធ្លាប់ត្រូវបាន អ្នកសារព័ត៌មាន ជាច្រើនធ្វើការផ្សព្វផ្សាយអំពីភាពមិនប្រក្រតី នៃការចាយថវិកាជាតិនៅក្នុងសាលារបស់ខ្លួនមិនប្រក្រតី៕
