អ្នកលេងល្បែងភ្នាល់នៅក្នុងទីតាំងខាងលើបានទម្លាយរឿងមិនប្រក្រតីថា កាស៊ីណូនេះ បង្កប់ដោយល្បែងស៊ីសងខុសច្បាប់ជាច្រើនមុខដូចជា ហ្គេមបាញ់ត្រី មាន់ប្រជល់គ្នាផ្លែដែក២០ ទៅ៣០គូក្នុង១ថ្ងៃ ហើយការលេងនោះប្តូរវេណម្ចាស់វិលជុំចាប់ពី ថ្ងៃចន្ទ ដល់ ថ្ងៃអាទិត្យ។ ថ្ងៃច័ន្ទ និង ថ្ងៃអង្គារ ម្ចាស់ឈ្មោះ ហុង ហួត រស់នៅ ខែត្រកំពត។ ពី ថ្ងៃពុធ និងព្រហស្បតិ៍ ម្ចាស់ឈ្មោះ វ៉ូច រស់នៅ ស្រុកឈូក។ ថ្ងៃសុក្រ និង ថ្ងៃសៅរ៍ ម្ចាស់ឈ្មោះ ប្រុស រស់នៅ ខែត្រកំពត។ ចំណែកឯ ថ្ងៃអាទិត្យ ម្ចាស់មកពី ភ្នំពេញ។ មាន់ទូរទស្សន៍ និងឡូតូអនឡាញ វិញមិនស្គាល់ម្ចាស់ទេ។ ចំណែកឯ យូគីកាត់ក្រដាសម្ចាស់ឈ្មោះ ឆាវ មកពី ខែត្រកំពត បានបង់លុយចំនួន១០លានរៀលក្នុង១ខែដើម្បីបានលេងក្នុងនោះ។ អ្នកលក់បាយ និងអ្នកលក់នំបញ្ចុកក៏បានបង់លុយក្នុង១ខែចំនួន៤លានរៀលដើម្បីបានលក់នៅក្នុងកន្លែងលេងល្បែងស៊ីសងនោះដែរ។
តើហេតុអ្វីបានជា កាស៊ីណូ បណ្តោយឱ្យជនជាតិខ្មែរចូលលេងក្នុងកាស៊ីណូនេះបានដោយសេរីអីចឹង ? ទង្វើប្រាសចាកជាមួយនឹងគោលនយោបាយ នៃរាជរដ្ឋាភិបាលកម្ពុជា បែបនេះតើច្បាប់នឹងមានវិធាការយ៉ាងណា ?
បើតាមអ្នកចូលទៅលេងទាំងនោះលើកឡើងទៀតថា ល្បែងស៊ីសងនេះបានបង្កជម្លោះចំនួនពីរលើកមកហើយ នៅក្នុងកន្លែងលេងផ្ទាល់តែម្ដង។ ទំនាស់លើកទី១ ទាស់គ្នារឿងលុយចំនួន៨លានរៀល ដែលបណ្តាលឲ្យក្មេងប្រុសម្នាក់ឈ្មោះ វីត ត្រូវបានសមត្ថកិច្ចឃាត់ខ្លួន។ ទំនាស់លើកទី២ រឿងលុយ២០ម៉ឺនរៀលជនជាតិខ្មែរបានទះកំផ្លៀងជនជាតិវៀតណាមម្នាក់ចំនួនពីរដៃ។ ល្បែងស៊ីសងនោះកំពុងធ្វើឱ្យអ្នកលេងចាញ់លុយរាប់ម៉ឺនដុល្លារ ហើយអ្នកខ្លះជំពាក់បំណុលធនាគារវ័ណ្តក អ្នកខ្លះទៀតក៏ឈ្លោះទាស់ទែងលែងលះគ្នាជាបន្តបន្ទាប់ អ្នកខ្លះប្រពន្ធខឹងដេញមិន ឱ្យចូលផ្ទះក៏មានដែរ…។
អ្នកនាំពាក្យ ក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន សារព័ត៌មាន យើងមិនអាចសុំផ្ដល់បទសម្ភាស៍បានទេ កាលពីរសៀលថ្ងៃទី១៧ ខែមីនា ឆ្នាំ២០២៥។
ចំពោះ មន្ទីរពាណិជ្ជកម្ម ខែត្រកំពត វិញលោក ស្រី កុម្ភៈ បានប្រាប់អង្គភាពសារព័ត៌មានយើងកាលពីថ្ងៃ១៧ ខែមីនា ឆ្នាំ២០២៥ ថា ការងារនេះមិនពាក់ព័ន្ធ មន្ទីរសេដ្ឋកិច្ច ទេគេអាចមានអាជ្ញាបណ្ណកាស៊ីណូ (casino) ពី ក្រសួងសេដ្ឋកិច្ច។
អ្នកគ្រប់គ្រងផ្នែកសន្ដិសុខសង្គមក្នុងមូលដ្ឋាន ខែត្រកំពត លោក ម៉ៅ ចន្ទមធុរិទ្ធិ ស្នងការដ្ឋាននគរបាល ខែត្របានប្រាប់បាយ៉ង់ថាមស៍ កាលពីថ្ងៃទី១៧ ខែមីនា ឆ្នាំ២០២៥ យ៉ាងខ្លីថា កាស៊ីណូ គេមានអាជ្ញាបណ្ណ…។
អ្នកលេងល្បែងភ្នាល់មាន់ជល់ម្នាក់ទៀតសុំមិនចេញអត្តសញ្ញាណបានប្រាប់ បាយ៉ង់ថាមស៍ កាលពីថ្ងៃទី១៦ ខែមីនា ថាការឃាត់ខ្លួនប្អូនប្រុសឈ្មោះ វីត មានពិតប្រាកដមែន ពីព្រោះគាត់នៅទីនោះដែរ។
ក្មេងប្រុសដែលត្រូវបាន សន្តិសុខកាស៊ីណូ ឃាត់ខ្លួននោះ សារព័ត៌មានយើង ព្យាយាមជួបគេដល់ផ្ទះដែរ ក៏ប៉ុន្តែមិនបានជួបនោះទេដោយសារអ្នកផ្ទះរបស់គាត់ប្រាប់ថា គេទៅដើរលេងបាត់ហើយ…។
ម្ចាស់កាស៊ីណូ និងម្ចាស់បើកល្បែងមាន់ជល់តាមវេណ សារព័ត៌មានយើង មិនអាចស្វែងរកប្រភពសុំបទសម្ភាស៍បានទេជុំវិញករណីខាងលើនេះ។ ទោះយ៉ាងណា សារព័ត៌មានយើង រង់ចាំការបំភ្លឺពីគ្រប់ភាគីពាក់ព័ន្ធ។
បើយោងតាមច្បាប់ស្ដីពី ការគ្រប់គ្រងល្បែងពាណិជ្ជកម្មកម្ពុជា ជំពូក៧ នៃមាត្រា៦៨ បញ្ជាក់ថា ការចូលលេងល្បែងនៅក្នុងកាស៊ីណូ ឬ គ្រឹះស្ថានល្បែងពាណិជ្ជកម្ម ត្រូវហាមឃាត់ដាច់ខាត ចំពោះបុគ្គលដូចខាងក្រោម។ ចំណុច (ង) ប្រជាពលរដ្ឋខ្មែរទូទៅដោយរួមទាំងកងកម្លាំងប្រដាប់អាវុធ អ្នករាជការសាធារណៈ និងពលរដ្ឋទទួលអាណត្តិដោយការបោះឆ្នោត។
គួរបញ្ជាក់ថា រឿងល្បែងស៊ីសងនេះ បើទោះបីជាប្រមុខ រាជរដ្ឋាភិបាលកម្ពុជា សម្តេចបវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ខំស្រែកឱ្យបិទយ៉ាងណាក៏មន្ត្រីឡេមឡឺមទាំងនោះមិនយកត្រចៀកស្តាប់នោះដែរ៕
