ផ្លូវទាំង២ខ្សែនោះ គឺក្រាលដោយល្បាយក្រួសមានប្រវែង១៦,៥០០ម៉ែត្រ ដែលមានទទឹងចំនួន៥ម៉ែត្រ និងមានកម្រាស់២០សង់ទីម៉ែត្រ ព្រមទាំងបានសាងសង់លូមូលរំដោះទឹកមុខកាត់១ម៉ែត្រ មួយជួរចំនួន១កន្លែង និងលូមូលមុខកាត់០,៦ម៉ែត្រចំនួន១កន្លែងស្ថិតនៅ ឃុំគោកស្រុក ស្រុកតំបែរ ខែត្រត្បូងឃ្មុំ (គម្រោងលេខ DRR-PM-2024-No.023)។
កាលពីព្រឹកថ្ងៃទី១៨ ខែវិច្ឆិកា ឆ្នាំ២០២៤ លោកជំទាវ ឯក គន្ធវារី អនុរដ្ឋលេខាធិការ ក្រសួងអភិវឌ្ឍន៍ជនបទ បានដឹកនាំប្រតិភូអន្តរក្រសួងរួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ បានចុះពិនិត្យ និងវាយតម្លៃលទ្ធផលការងារថែទាំខួបផ្លូវចំនួន២ខ្សែខាងលើ និងមានចែកក្រមាជូនពលរដ្ឋក្រីក្រខ្លះៗថែមទៀត។
បើយោងតាមប្រភពសុំមិនបញ្ចេញឈ្មោះពីមន្ត្រី នៃមន្ទីរអភិវឌ្ឍន៍ជនបទ ខែត្រត្បូងឃ្មុំ បានប្រាប់ បាយ៉ង់ថាមស៍ ឱ្យដឹងនៅព្រឹកថ្ងៃទី២៧ ខែមករា ឆ្នាំ២០២៥ ថា លោក អាន ស៊ីណា ប្រធានមន្ទីរអភិវឌ្ឍន៍ជនបទ ខែត្រត្បូងឃ្មុំ បានលើកគម្រោងចាយលុយរដ្ឋច្រើនសន្ធឹកសន្ធាប់គ្រាន់តែថែទាំខួបផ្លូវ ក៏ប៉ុន្តែការចំណាយទៅលើការងាររបស់ មន្ទីរដ៏តិចតួចបំផុតនេះធ្វើឱ្យគុណភាពផ្លូវលំឆាប់ខូច។ គម្រោងទាំងនេះមន្ទីរបានចំណាចថវិកាអស់ត្រឹម២០ ទៅ៣០ភាគរយហើយគេអាចនៅសល់យ៉ាងតិចពី៧០ទៅ៨០ភាគរយឯណោះ។
ប្រភពដដែលក៏បានទទូចស្នើសុំឱ្យខាង អធិការកិច្ច ក្រសួងអភិវឌ្ឍន៍ជនបទ ក្រសួងសេដ្ឋកិច្ច និងអង្គភាពប្រឆាំងអំពើពុករលួយ គួរតែចុះស៊ើបអង្គេត ឬធ្វើការស្រាវជ្រាវករណីនេះផងទាន។
នៅព្រឹកថ្ងៃទី២៧ ខែមករា ឆ្នាំ២០២៥ លោក អាន ស៊ីណា ប្រធានមន្ទីរអភិវឌ្ឍន៍ជនបទ គឺអង្គភាពយើងពុំអាចទាក់ទងសុំការបំភ្លឺបានទេ ជុំវិញការចោទប្រកាន់ខាងលើនេះ។ ចំណែកអ្នកនាំពាក្យ ក្រសួងអភិវឌ្ឍន៍ជនបទ វិញនៅថ្ងៃដដែលក៍មិនអាចទាក់ទងសុំការពន្យល់បាននោះដែរ៕
