ភ្នំពេញៈ លោក ប៉ោ សួន អនុប្រធាននាយកដ្ឋានកិច្ចការច្បាប់សវនកម្ម និងទំនាក់ទំនងសាធារណៈ នៃអគ្គនាយកដ្ឋានគយ និង រដ្ឋាករកម្ពុជា បានសរសេរសារឌឺដងដាក់មន្ត្រីរាជការ នៃអគ្គនាយកដ្ឋានគយ ក៍ដូចជាក្រុមអាជីវកររកស៊ីដឹកទំនិញ កាលពីថ្ងៃទី១៣ ខែកុម្ភៈ ឆ្នាំ២០២៣ ដែលលោកសំដៅលើអ្នកបានផ្ដល់ព័ត៌មានឱ្យកាសែតចុះផ្សាយពីរឿងកោះហៅ ក្រុមហ៊ុននាំចូលនាំចេញទំនិញតាមច្រកព្រំដែនទាំងអស់ឱ្យមកជួប ដើម្បីធ្វើការចរចា សម្របសម្រួលទំនងជាផលប្រយោជន៍បុគ្គលសម្រាប់ការដឹកជញ្ជូនឱ្យបានរលូន។
ស្ថិតក្នុងសំលៀកបំពាក់ជាមន្ត្រីគយទទួល វិញ្ញាបនបត្រ វគ្គបណ្ដុះបណ្ដាលខ្លីនៅ ទីចាក់ការគយភ្នំពេញ លោក ប៉ោ សួន បានសរសេរសារខ្លីដៀមដាមដាក់អ្នកដែលបានផ្ដល់រឿងអាស្រូវរបស់ខ្លួនឱ្យកាសែតចុះផ្សាយនៅក្នុង អាខោនហ្វេសប៊ុកផ្ទាល់ខ្លួន ( Soun Por ) កាលពីថ្ងៃទី១៣ ខែកុម្ភៈ ឆ្នាំ២០២៣។ ខ្លឹសារឌឺដងរបស់លោកនោះបញ្ជាក់ថា «ឱមនុស្សអើយមនុស្ស ព្រៃផ្សៃយ៉ាងនេះ ប្រឹងបង្កាច់បង្ខូចគេតាមគ្រប់មធ្យោបាយ ដើម្បីឱ្យគេទទួលទោស ចំ ពោះមុខកំហុសខ្លួនឯង ដែលកំពុងប្រព្រឹត្តជារៀងរាល់ថ្ងៃ។ បើបង្ខូចគេ គេប្រព្រឹត្តដូចយើងថា មែនវាគួរបង្ខូចតែជារឿងខ្លួនឯងប្រព្រឹត្តសោះ ក៏នឹកស្មានថា គេធ្វើដូចខ្លួនដែរ។ ឈប់បានឈប់ទៅ ហើយប្រឹងប្រែងការងារតម្រង់ ទិសកៀរគរដើម្បីកន្លែងយើងទាំងអស់គ្នាទើបជាការប្រសើរ…»។
វាមិនខុសអ្វី «មាន់ពងនឹងស្រូវវាត្រូវតែស៊ីស្រូវ»។ រីឯលោក ប៉ោ សួន វិញធ្វើជាមន្ត្រីគយ បើមិនខំបូមតើបានលុយពីណាឱ្យកូនទៅរៀននៅក្រៅប្រទេស។ ដើម្បីបិទបាំងសកម្មភាពព្រូនសង្គមរបស់ខ្លួនលោក ប៉ោ សួន ដែលមាន ងារជាឧកញ៉ាផង បានឆ្លើយបំភ្លឺតាមរយៈប្រព័ន្ធបណ្ដាញសង្គម តេឡេក្រាម ប្រាប់បាយ៉ង់ថាមស៍ កាលពីរសៀលថ្ងៃទី១៣ ខែកុម្ភៈ ឆ្នាំ២០២៣ ថា « ខ្ញុំគ្មានសិទ្ធិកោះហៅក្រុមហ៊ុនណាមកជួបអ្វីទាំងអស់ ហើយក៍មិនឱ្យក្រុមហ៊ុន ណាមកជួបខ្ញុំនោះដែរ។ ក្នុងនាមជាមន្ត្រីគយគ្រប់រូប មានសិទ្ធិ តួនាទី ភារកិច្ច គ្រប់ៗគ្នាសម្រាប់អនុវត្ត។ ខ្ញុំ
បានឃើញកាសែត The Cambodia daily ចុះផ្សាយតែខុសការពិតទាំងស្រុង។ បងអាចសាកសួរអ្នករកស៊ីនៅ ខែត្រតាកែវ ទៅដឹងច្បាស់ហើយ…»។
មន្ត្រីរាជការ នៃអគ្គនាយកដ្ឋានគយ និងរដ្ឋាករកម្ពុជា ក៏ដូចក្រុមអាជីវករ បានបង្ហើបប្រាប់ «បាយ៉ង់ថាមស៍» ដោយសុំមិនបញ្ចេញឈ្មោះនៅព្រឹកថ្ងៃទី២០ ខែកុម្ភៈ ឆ្នាំ២០២៣ នេះថា អគ្គនាយកដ្ឋានគយ និងរដ្ឋាករកម្ពុជា ក្រោមការគ្រប់គ្រងរបស់លោក គុណ ញឹម សព្វថ្ងៃនេះបានធ្វើព្យុះភ្លៀងក្រោមរូបភាពក្បត់ខ្លឹមសារដូចជា ការបង្កើតឱ្យមាន ក្រុមអនុលោម ឬ ក្រុមជំនួយការសម្រាប់ចុះត្រួតពិនិត្យ សាខាការិយាល័យគយ និងរដ្ឋាករកម្ពុជា តាមច្រកចេញចូលព្រំដែន ដើម្បីប្រព្រឹត្តអំពើពុករលួយដោយលួចលាក់។
ប្រភពដដែលបានលើកឡើងពីល្បិចកៀងទាបញ្ចូលទ្រុងថា ក្រោមរូបភាពអនុវត្ត នៃការត្រួតពិនិត្យទំនិញតាមមាត់ច្រកនេះ ក្រុមអនុលោម ឬ ក្រុមជំនួយការ ដែលមានលោក ប៉ោ សួន ជាអនុប្រធាននាយកដ្ឋានកិច្ចការច្បាប់សវនកម្ម និងទំនាក់ទំនងសាធារណៈ បានប្រើសិទ្ធិអំណាចរបស់ខ្លួនកោះហៅ ក្រុមហ៊ុននាំចូលនាំចេញ ទាំងអស់ឱ្យមកជួបដើម្បីធ្វើការចរចា សម្របសម្រួលទំនងផលប្រយោជន៍បុគ្គលសម្រាប់ការដឹកជញ្ជូនទំនិញ របស់ក្រុមហ៊ុនទាំងនោះដោយគេចពន្ធឱ្យបានរលូន។
ក្រុមមន្ត្រីរាជការទាំងនោះបញ្ជាក់ថា ជាធម្មតាម្ចាស់ក្រុមហ៊ុននាំចេញនាំចូលទំនិញទាំងនោះ មិនដែលបង់ពន្ធ ជូនរដ្ឋគ្រប់១០០ភាគរយនោះទេ។ បើទោះជាពួកគេបង់ថវិកាចូលរដ្ឋ១០០ភាគរយក៏ដោយ ក៏ត្រូវបាន មន្ត្រីគយទាមទារឲ្យបង់សេវាបន្ថែមទៀត ដើម្បីឲ្យពួកគេអាចបែងចែកថវិកាទាំងនោះសម្រាប់ដាក់ហោប៉ៅរៀងៗខ្លួនបើពុំដូច្នោះទេឯកសារត្រូវរាំងស្ទះ។ ដូច្នេះម្ចាស់ក្រុមហ៊ុនអស់ទាំងនោះ មានតែធ្វើតាមមធ្យោបាយការចង់បានរបស់លោក ប៉ោ សួន តែប៉ុណ្ណោះ។ ទង្វើរបស់លោក ប៉ោ សួន កាន់តែខ្លាំងក្លាឡើងៗដោយសារមានខ្នងបង្អែកអ្នកធំការពារនៅក្រោយផងដែរ។
ទាក់ទិននឹងបញ្ហានេះ ក៏មានការរិះគន់ជាច្រើនផងដែរ កាលពីពេលកន្លងទៅថា លោក ប៉ោ សួន បានលួចកែបន្ថយឆ្នាំកំណើតដល់ទៅ១០ឆ្នាំគឺពី ឆ្នាំ១៩៦៤ មកនៅ ឆ្នាំ១៩៧៤ វិញដើម្បីពន្យារអាយុត្រូវចូលនិវត្តន៍ ខណៈតារាងបៀវត្សរ៍ ឆ្នាំ២០២១ បង្ហាញថា លោកកើតនៅក្នុង ឆ្នាំ១៩៦៤។
ទោះជាបែបនេះក្តីលោក ប៉ោ សួន ធ្លាប់បានអះអាងថា ការកែប្រែឆ្នាំកំណើតរបស់លោក គឺដើម្បីឲ្យត្រូវនឹងឆ្នាំកំណើតពិតដែលលោកបានកើតតែប៉ុណ្ណោះ។
មិត្តភក្តិរបស់លោក ប៉ោ សួន ដែលធ្លាប់បានរៀនសូត្រថ្នាក់ជាមួយគ្នានៅ វិទ្យាល័យទន្លាប់ ស្រុកគិរីវង់ ខែត្រតាកែវ អះអាងថា លោក ប៉ោ សួន មានឈ្មោះដើមហៅថា ឡេង វណ្ណារិទ្ធិ ហៅ ប្រុស មានស្រុកកំណើតនៅ ភូមិត្រើយទន្លាប់ ឃុំព្រះបាទជាន់ជុំ ស្រុកគិរីវង់ ខែត្រតាកែវ។ លោកបានប្រឡងជាប់បាក់ឌុបនៅ ឆ្នាំ១៩៨៩ ហើយក៏បានចូលធ្វើជា «មន្ត្រីគយ» នៅក្នុងឆ្នាំ១៩៩៣ ក្រោយពីលោកបានទិញឈ្មោះពីមន្ត្រីគយម្នាក់តាមរយៈមន្ត្រី គណបក្សហ៊្វុនស៊ិនប៉ិច ក្នុងតម្លៃប្រហែល៣ពាន់ដុល្លារអាម៉េរិកនៅពេលនោះ ហើយលោកក៏បន្តធ្វើជា មន្ត្រីគយរហូតមកដល់សព្វថ្ងៃនេះ។
កាលពីចុង ឆ្នាំ២០២២ លិខិតរបស់មន្ត្រីរាជការ ជិតដល់អាយុចូលនិវត្តន៍ក្នុងពេលឆាប់ៗនេះមានចំនួន១៩រូបបានស្នើសុំកិច្ចអន្តរាគមន៍ទៅ រាជរដ្ឋាភិបាល និងស្ថាប័នពាក់ព័ន្ធត្រូវបានបែកធ្លាយព័ត៌មាន ដែលពួកគេនាំគ្នារត់ការសុំបន្ថយអាយុ ដើម្បីអាចមានលទ្ធភាពបន្តការងារជា មន្ត្រីគយ និងរដ្ឋាករកម្ពុជា បានបន្តទៅទៀត។ ក្នុងនោះពួកគេត្រូវចំណាយលុយក្នុងម្នាក់ៗរាប់ម៉ឺនដុល្លារអាម៉េរិកក្នុងមួយឆ្នាំ។
បើតាមច្បាប់ស្ដីពីសហលក្ខន្តិកៈ មន្ត្រីរាជការស៊ីវិល មាត្រា៥៤ ចែងថា អ្នករាជការទាំងពីរភេទត្រូវដាក់ឱ្យចូលនិវត្តន៍ជាកំហិតពេលដល់អាយុ៥៥ឆ្នាំ។ តែអាយុកំហិតនេះអាចរំកិលដល់៦០ឆ្នាំបានប្រសិនបើមាន លក្ខន្តិកៈដាច់ដោយឡែកបានកំណត់។ ប៉ុន្តែច្បាប់នេះក៏បានកំណត់ដោយកំហិតដែរថា អ្នកដែលមានអាយុកំណត់ដោយច្បាប់ត្រូវតែចូលនិវត្តន៍ ដោយពុំមាន កិច្ចអន្តរាគមន៍ពិសេសណាមួយនោះទេ។
គួរបញ្ជាក់ថា បើលោក ប៉ោ សួន ចង់លាងខ្លួនថា ស្អាតស្អំមែននោះគួរតែបើកឱ្យខាង អធិការកិច្ច ក្រសួងសេដ្ឋ កិច្ច និងហិរញ្ញាវត្ថុ ជាពិសេស អង្គភាពប្រឆាំងអំពើពុករលួយ ហៅកាត់ថា អេស៊ីយូ ( ACU ) របស់លោក ឱម យ៉ិនទៀង ធ្វើការស៊ើបអង្គេតទៅនោះនឹងដឹងការពិតហើយ…៕
