ជីវិតដ៏កំសត់ទាំង៩គ្រួសារនោះរស់នៅក្នុងខ្ទមតូចៗសំចតលើគំនរសំរាមដ៏ស្អុយរលួយពោរពេញទៅដោយសត្វរុយរាប់លានក្បាលតែពួកគាត់ទាំងអស់គ្នាបានត្អូញត្អែរទាំងទឹកមុខក្រៀមក្រំ។ មានពេលខ្លះពួកគាត់រកតែអង្ករច្រកឆ្នាំងមិនចង់តែបានផង។ រីឯចំណូលដែលបានមកពីការរើសសម្បកកំប៉ុងវិញ ក្នុង១ថ្ងៃរកមិនបានប្រាក់ចំនួន២ ម៉ឺនរៀលផង ដោយសារតែអ្នកដឹកជញ្ជូនសំរាមគេរើសមុន១ដងរួចហើយទើបពួកគាត់រើសតាមក្រោយ។
រឿងត្រីងៀតឆ្លៀតពងរបស់មន្ត្រីខិលខូចតែងតែកើតមានឡើងចំពោះមនុស្សដែលមានសេចក្តីលោភលន់ពន់ប្រមាណ ឥតសំចៃគិតពីជីវិតអ្នកក្រលំបាកតោកយ៉ាកគ្មានអាហារហូបចុកគ្រប់គ្រាន់នោះកំពុងតែដើរផ្ទុយពី គោលនយោបាយ រាជរដ្ឋាភិបាលកម្ពុជា ដែលលោកកំពុងរិះរកមធ្យោបាយដើម្បីជួយដល់ពលរដ្ឋរងគ្រោះទាំងនោះ។ ចុះហេតុអ្វីបានជាលោក លាង ប៊ុនលី មកធ្វើសកម្មភាពកេងប្រវ័ញ្ចលើកម្លាំងញើសហូរឈាមពលរដ្ឋខ្មែរក្រីក្រទៅវិញ ?
លោក ប៊ុន យោង អ្នកនាំពាក្យសាលា ខែត្រកែប មិនបានឆ្លើយនឹងសំណួរអ្នកកាសែតទេជុំវិញករណីខាងលើនេះ។ ដោយលោកគ្រាន់តែសរសេរសារតបថា សួស្តី ! អញ្ជើញពីខាងណាដែរ ? បើជាអ្នកសារព័ត៌មាន ទី១.សូមបង្ហាញ កាតសម្គាល់។ ទី២.អាជ្ញាបណ្ណ ! សូមអរគុណ ! ពេលអ្នកកាសែតប្រាប់ថា គាត់បានដាក់ឯកសារនៅ មន្ទីរព័ត៌ មាន ខែត្រកែប រួចរាល់ហើយលោកបានផ្ញើសារមួយឃ្លាយ៉ាងខ្លីទៀតថា សូមបាញ់មកខ្ញុំ១ផង នៅថ្ងៃទី៣ ខែមីនា ឆ្នាំ២០២៥។
ចំណែកលោក ឃន វុទ្ធី អភិបាល ក្រុងកែប វិញសារព័ត៌មានយើងមិនអាចទាក់ទងសុំការបំភ្លឺបានទេនៅព្រឹកថ្ងៃទី៣ ខែមីនា ឆ្នាំ២០២៥ នេះ។
ចំពោះបងស្រីឈ្មោះ ប្រុច ស្រីអូន វ័យប្រហែល៣៧ឆ្នាំជាអ្នករស់នៅ និងរើសសម្បកកំប៉ុងទីនោះផ្ទាល់បានលើកឡើងទាំងទឹកមុខក្រៀមក្រំ កាលពីថ្ងៃទី២ ខែមីនា ថា ពេលដែលពួកគាត់តវ៉ាស្នើសុំអ្វីផ្សេងៗនោះគេផ្អាកពួកគាត់ឈប់ឱ្យរើសសំរាម។ដូច្នេះទើបពួកគាត់ព្រមបង់លុយឱ្យមន្ត្រីឈ្មោះ ប៊ុនលី នោះដើម្បីបានរើសសំរាមបន្តទៀត។ លោកស្រីបន្តថា គាត់សូមសំណូមពរដល់ថ្នាក់ដឹកនាំ ខែត្រកែប សូមជួយសម្រួលដល់ពួកគាត់ផងបើយកលុយពីគាត់ហើយសូមកុំឱ្យមានអ្នកដឹកជញ្ជូនសំរាមរើសមុនពួកគាត់អី ពីព្រោះពួកគាត់បានបង់លុយឱ្យគេហើយ។
បុរសឈ្មោះ ដា មានវ័យប្រហាក់ប្រហែលគ្នានឹង ប្រុច ស្រីអូន បានរៀបរាប់នៅថ្ងៃដដែលនោះថា ពីមុនមិនដែលមានការបង់ថ្លៃអ្វីនោះទេទើបតែអភិបាលក្រុងថ្មីឡើងកាន់តំណែងក៏មានលោក លាង ប៊ុនលី ប្រាប់ថា សុំថ្លៃប្រេងដើម្បីរុញសំរាម។ លោកបន្តទៀតថា ដំបូងគាត់សុំបង់ឱ្យគេក្នុង១គ្រួសារចំនួន៣ម៉ឺនរៀលតែពួកគេទារចំនួន៣០ ដុល្លារ រួចមកដោយមានការខ្លាចមិនបានរើសសំរាមបន្តទៀតថា ទើបពួកគាត់ព្រមបង់លុយក្នុង១គ្រួសារ១០ ម៉ឺនរៀល។
គាត់បន្ថែមទៀតថា កាលពីអភិបាលក្រុង មុនតែងតែមកសួរសុខទុក្ខពួកគាត់ និងបានចែកជូននូវអង្ករសម្ភារៈមួយចំនួនទៀតផង។ រាស្ដ្រក្រីក្ររស់នៅលើគំនរសំរាមមានមន្ត្រីច្បាមទាមទារប្រាក់ដោយមិនចេះខ្មាសអៀនខ្លួន សោះ…។
ជុំវិញករណីខាងលើលោក លាង ប៊ុនលី ជាមន្ត្រីនៃស្នងការដ្ឋាននគរបាល ខែត្រកែប បានបដិសេធយ៉ាងខ្លីថា លោកមិនបានយកលុយដូចការលើកឡើងរបស់ពលរដ្ឋនោះទេ កាលពីរសៀលថ្ងៃទី២ ខែមីនា ឆ្នាំ២០២៥។
គួរបញ្ជាក់ថា ករណីមន្ត្រីគ្រាប់ល្ពៅស្ងោរនៅមិនចេះអស់ បើទោះបីជាមានការដកហូតដំណែងជាបន្តបន្ទាប់គ្នាជាច្រើនកន្លងមកក៏ដោយ។ យ៉ាងណាអ្នក សារព័ត៌យើង សុំមិនបញ្ចេញមតិទេ ? សូមទុកនាទីឱ្យ មហាជនពិចារណា និងថ្នាក់ដឹកនាំទទួលដឹងតាមការគួរ…៕
