យោងតាមសេចក្តីប្រកាសព័ត៌មាន នៃអ្នកនាំពាក្យ អគ្គស្នងការដ្ឋាននគរបាលជាតិ ចេញនៅថ្ងៃទី២៤ ខែកុម្ភៈ ឆ្នាំ២០២៥ ថា គណៈបញ្ជាការដឹកនាំស្រាវជ្រាវស៊ើបអង្កេត និងបង្ក្រាបបទល្មើសគ្រប់ប្រភេទ នៃក្រសួងមហាផ្ទៃ បានឲ្យដឹងថា កាលពីថ្ងៃទី២២ និងថ្ងៃទី២៣ ខែកុម្ភៈ ឆ្នាំ២០២៥ ក្រុមប្រតិបត្តិការរបស់ គណៈបញ្ជាការ ធ្វើការចុះត្រួតពិនិត្យជាក់ស្តែងលើទីតាំងចំនួន២ទីតាំងស្ថិតក្នុង ភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត ខែត្របន្ទាយមានជ័យ បន្ទាប់ពីបានធ្វើការស្រាវជ្រាវស៊ើបអង្កេតលើទីតាំងខាងលើអស់រយៈពេលជាងបីខែកន្លង មក ក៏ឈានទៅបង្ក្រាបទីតាំងទាំងពីរខាងលើនេះធ្វើឡើងក្រោមបទបញ្ជាដ៏ម៉ឺងម៉ាត់បំផុតរបស់ ឯកឧត្តមអភិសន្តិបណ្ឌិតឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏ដូចជាការចង្អុលដឹកនាំដោយផ្ទាល់របស់ ឯកឧត្តម នាយឧត្តមសេនីយ៍អគ្គស្នងការនគរបាលជាតិ។
ក្នុងការឆ្មក់ចូលក្នុងទីតាំងនេះសមត្ថកិច្ចរកឃើញជនបរទេសសរុបចំនួន២៣០នាក់ (ស្រី៦៨នាក់) ក្នុងនោះមាន ជនជាតិថៃចំនួន១២៣នាក់ (ស្រី៥៩នាក់)។ ជនបរទេសទាំងនោះកំពុងពួនសម្ងំលាក់ខ្លួនលួចធ្វើសកម្មភាពអន ឡាញខុសច្បាប់ដោយមានមេខ្លោងជាជនជាតិចិន និងស្ថិតក្នុងស្ថានភាពរស់នៅធម្មតាព្រមទាំងទទួលយកការ ងារខុសច្បាប់ទាំងនោះដោយស្ម័គ្រចិត្ត។
ពលរដ្ឋថៃទាំង១២៣នាក់ នគរបាលជាតិកម្ពុជា នឹងស្នើសុំកិច្ចសហការជាមួយ នគរបាលភូមិន្ទថៃ ដើម្បីមានវិធានការបន្ត ក៏ដូចជាសហការដើម្បីកំណត់មុខសញ្ញាមេខ្លោងសំខាន់ដទៃទៀត នឹងឈានទៅស្វែងរកចាប់ខ្លួនជនល្មើសជាមេខ្លោងយកមកអនុវត្តច្បាប់ នៃព្រះរាជាណាចក្រកម្ពុជា។ ចំពោះជនបរទេសផ្សេងទៀតសមត្ថកិច្ចកំពុងធ្វើការសាកសួរ និងចាត់វិធានតាមច្បាប់ នៃកម្ពុជា៕
