ភ្នំពេញៈ ឆាយ យ៉ាវិន ជាកូនស្រីពៅក្នុងគ្រួសារសប្បុរសសាមញ្ញមួយនៅ រាជធានីភ្នំពេញ នាងបានកើតនៅថ្ងៃទី២០ ខែមករា ឆ្នាំ២០១១ គិតត្រឹមថ្ងៃទី២០ ខែមករា ឆ្នាំ២០២៥ មានវ័យ១៣ឆ្នាំនឹងឈានចូល១៤ឆ្នាំ។ នាងមានបងប្អូនបង្កើតចំនួន៤នាក់ ប្រុស២នាក់ ស្រី២នាក់ ជាកូនពៅគេបង្អស់ដែលមានមុខមាត់ដូចនឹងឪពុក។ នាងបានចូលរៀន សាលាមត្តេយ្យ នៅអាយុ៣ឆ្នាំ។ ក្នុងឆ្នាំសិក្សា ឆ្នាំ២០២៤-២០២៥ សព្វថ្ងៃរៀននៅ សាលាអន្តរជាតិ ស៊ី អាយ អេ (CIA) ថ្នាក់ទី៨។
កាលពីនៅកុមារី ឆាយ យ៉ាវិន ចូលចិត្តរាំរបាំ គឺរបាំអប្សរា និងរបាំបាឡេ។ ប៉ុន្តែចូលដល់វ័យជំទង់នាងចូលចិត្តកីឡាហែលទឹក ព្រោះនាងមានក្ដីប្រាថ្នាមួយ គឺចង់ចូលរួមប្រកួត កីឡាស៊ីហ្គេម វិញ្ញាសាហែលទឹក នៅពេលនាងគ្រប់អាយុចូលប្រកួតក្នុង ស៊ីហ្គេម បាន។
ឆាយ យ៉ាវិន ជាក្មេងស្រីឆ្នើមឧស្សាហ៍ព្យាយាមរៀនសូត្រ ហើយឆ្លាតឈ្លាសវៃស្ដាប់បង្គាប់ឪពុកម្ដាយ និងលោកគ្រូអ្នកគ្រូ។ នៅក្នុងសាលានាងពូកែខាង ប្រវត្តិសាស្រ្តខ្មែរ និងភាសាអង់គ្លេស។ លើសពីនេះទៅទៀតនាងជាក្មេងស្រីកម្រទុកពេលឱ្យនៅទំនេរណាស់ ក្រៅពីម៉ោងសិក្សានៅសាលារៀន ឆាយ យ៉ាវិន តែងតែសិក្សាស្រាវជ្រាវ និងអានសៀវភៅជាប្រចាំថ្ងៃ។ ឆាយ យ៉ាវិន ជាក្មេងស្រីដែលរុះរាយរាក់ទាក់ចូលចិត្តរាប់អានអ្នកផងទាំងពួង មិនយកអ្នក ណាម្នាក់ជាសត្រូវឡើយ។
ដោយមានការលើកទឹកចិត្ត និងផ្ដល់ភាពកក់ក្ដៅពីឪពុកម្ដាយ ឆាយ យ៉ាវិន បានខិតខំរៀនសូត្រយ៉ាងសកម្មមុននឹងទទួលបានជ័យលាភីជាមេដាយមាសលំដាប់ពិភពលោក លើមុខវិជ្ជាប្រវត្តិសាស្រ្ត ជូនគ្រួសារ និងប្រទេសកម្ពុ ជា។ នៅក្នុងដំណើរការប្រឡងប្រជែងនោះ ឆាយ យ៉ាវិន ត្រូវប្រឡងនៅ ប្រទេសកូរ៉េ និងចុងក្រោយនៅ សហរដ្ឋអាម៉េរិក។
ថ្លែងពីឪពុកម្ដាយវិញក្នុងទឹកចិត្តសោមនស្សរីករាយប្រកបដោយមោទកភាពផងនោះលោកស្រី ឆាយ លីណា អគ្គនាយិការងនៃវិទ្យុជាតិកម្ពុជា ដែលត្រូវជាម្ដាយរបស់ ឆាយ យ៉ាវិន បានរៀបរាប់យ៉ាងរំភើបក្នុងសម្ដីក្ដុកក្ដួលអួលដើមកនៅក្នុងពិធីអបអរសាទរដល់កូនស្រីដែលទទួលបាន ជ័យលាភីជាមេដាយមាសលំដាប់ពិភពលោក យ៉ាងដូច្នេះថា « ខ្ញុំរំភើបចិត្តណាស់ពេលឃើញរូបកូនស្រីនៅក្នុងទូរទស្សន៍ ប្រទេសកូរ៉េ កាន់ទង់ជាតិ ព្រះរាជាណាចក្រកម្ពុជា នៅលើឆាកអន្តរជាតិ ក្នុងនាមម្ចាស់មេដាយមាសលំដាប់ពិភពលោក ដល់ទៅពីរ »។
ចំណែកលោកបណ្ឌិត ភីតថឺ លី ដែលត្រូវជាឪពុកពុំមានយោបល់អ្វីក្រៅពីផ្ដល់ក្ដីញញឹម និងរៀបចំកម្មវិធីហូបអាហារសាមគ្គីជូនបងប្អូនសាច់ញាតិពេលល្ងាចដើម្បី អបអរសាទរកូនស្រី ដែលទទួលបាន មេដាយមាសលំដាប់ពិភពលោក ដោយទឹកចិត្តសោមនស្សរីករាយយ៉ាងក្រៃលែងនោះទេ។
ក្នុងពិធីអបអរសាទរ ជ័យយលាភីមេដាយមាសលំដាប់ពិភព នាយប់ថ្ងៃទី១៩ ខែមករា ឆ្នាំ២០២៥ ដែលរៀបចំឡើងដោយឪពុកមា្ដយរបស់ ឆាយ យ៉ាវិន នៅគេហដ្ឋានរបស់ពួកគាត់ឯ ភូមិស្វាយជ្រុំ សង្កាត់ព្រែកតាកូវ ក្រុងអរិយ ក្សត្រ ខែត្រកណ្ដាល ឆាយ យ៉ាវិន បានផ្ដល់ពិសោធន៍ថា « ដើម្បីទទួលបានចំណេះដឹងខ្លាំង យើងត្រូវធ្វើស្វ័យសិក្សា និង អានសៀវភៅឱ្យបានច្រើន »។ ចុងក្រោយនាងបានជូនសារខ្លីមួយប្រកបដោយអត្ថន័យជ្រាលជ្រៅដល់យុវវ័យស្រករៗគ្នាថា « មានក្ដីស្រមៃខ្ពស់សម្រេចក្ដីបំណងខ្ពស់ »៕
