ខែត្រព្រះសីហនុៈ លោកមេប៉ុស្តិ៍ សង្កាត់លេខ៣ ក្រុងព្រះសីហនុ ដែលបានប្រើអំពើហិង្សាលើពលរដ្ឋស្លូតត្រង់ម្នាក់ដោយបានវាយដំទាត់ធាក់ធ្វើទារុណកម្មរហូត ជាំថ្លើម ជាំសួត កាលពីថ្ងៃទី៦ ខែកក្កដា ឆ្នាំ២០២៤ ក្នុងដែនរដ្ឋ បាល សង្កាត់លេខ៣ កន្លងទៅបើផ្អែកតាមនីតិវិធីតុលាការជនជាប់ចោទពីបទ «ហិង្សាដោយចេតនាមានស្ថានទម្ងន់ទោស» ។ នេះយោងតាមសេចក្ដីជូនដំណឹងមកដើមបណ្ដឹងស្ដីពីបិទការស៊ើបសួររបស់ចៅក្រម នៃសាលាដំបូង ខែត្រព្រះសីហនុ លេខ៦៦៥៣ រ.ប/ក/២៤ ចុះថ្ងៃទី៣ ខែធ្នូ ឆ្នាំ២០២៤។
បើផ្អែកតាម មាត្រា៣៨ នៃរដ្ឋធម្មនុញ្ញ បានចែងថា « វិមតិសង្ស័យ ត្រូវបានជាប្រយោជន៍ដល់ជនជាប់ចោទ ដែលជនជាប់ចោទណាក៏ដោយត្រូវទុកជាមនុស្សឥតទោសដរាបណា តុលាការ មិនទាន់កាត់ទោសជាស្ថាពរ។ ជនគ្រប់រូបមានសិទ្ធិការពារខ្លួនតាមផ្លូវតុលាការ»។ ដូច្នេះលោក អ៊ុក ផាន់ណារ៉េត មេប៉ុស្ដិ៍រដ្ឋបាលនគរបាល សង្កា ត់លេខ៣ ក្រុងព្រះសីហនុ ដែលជាជនជាប់ចោទពីបទ «ហិង្សាដោយចេតនាមានស្ថានទម្ងន់ទោស» នៅតែមានសិទ្ធិបំពេញការងារមន្ត្រីននគរបាល និងទទួលប្រាក់ខែធម្មតា។ តើ «វិមតិសង្ស័យ» មានន័យដូចម្ដេច ? «វិមតិសង្ស័យ» មានន័យថា ជាសេចក្តីសង្ស័យមិនទាន់មានការកាត់ក្តីជាស្ថាពរ។
កាលពីយប់ថ្ងៃទី៦ ខែកក្កដា ឆ្នាំ២០២៤ នៅ សង្កាត់លេខ៣ ក្រុងព្រះសីហនុ ដោយអាងខ្លួនជា មន្រ្តីកម្លាំងប្រដាប់អាវុធក្នុងនាមជាមេប៉ុស្តិ៍នគរបាលរដ្ឋបាល សង្កាត់លេខ៣ និងបក្ខពួកបួននាក់ទៀតបានចាប់ពលរដ្ឋវាយខ្នោះគ្រាន់តែទំនាស់ពាក្យសម្ដីបន្តិចបន្តួចរួចបង្ខាំងធ្វើទារុណកម្ម ទាត់ធាក់ រហូតដល់រងរបួសធ្ងន់ធ្ងរ និងជាំថ្លើមជាំសួត។ បន្ទាប់មកលោកមេប៉ុស្តិ៍យកជនរងគ្រោះទៅពិនិត្យទឹកនោមរកសារធាតុញៀនតែលទ្ធផល «អវិជ្ជមាន» ក៏បញ្ជូនជនរងគ្រោះទៅ អធិការដ្ឋាននគរបាល ក្រុងព្រះសីហនុ។ ក្រោយមកនគរបាល ក្រុងព្រះសីហនុ ក៏ពិនិត្យទឹកនោដែរលទ្ធផល «អវិជ្ជមាន» ទៀត និងទំនងជារកធាតុផ្សំនៃបទល្មើសពុំឃើញអធិការក្រុងក៏ដោះលែងជន រងគ្រោះមកវិញនៅព្រឹកថ្ងៃបន្ទាប់ព្រមទាំងស្នើសុំកុំឱ្យជនរងគ្រោះប្ដឹងផ្ដល់។ នេះយោងតាមពាក្យបណ្ដឹងរបស់ជន
រងគ្រោះ ចុះថ្ងៃទី១៥ ខែកក្កដា ឆ្នាំ២០២៤ បន្ទាប់ពីជនរងគ្រោះបានចេញពី មន្ទីរពេទ្យបង្អែក ខែត្រព្រះសីហនុ។
ជនរងគ្រោះក៏បានដាក់ពាក្យប្ដឹងទៅសាលា ខែត្រព្រះសីហនុ នៅថ្ងៃទី២៩ ខែកក្កដា ឆ្នាំ២០២៤ និងប្ដឹងទៅ អគ្គស្នងការនគរបាលជាតិ កាលពីថ្ងៃទី១ ខែសីហា ឆ្នាំ២០២៤។ ក្នុងចំណោមពាក្យបណ្ដឹង ដែលបានដាក់ទៅបីស្ថាប័នខាងលើគេកត់សម្គាល់ឃើញតែស្ថាប័ន តុលាការ ប៉ុណ្ណោះដែលមានចំណាត់តាមនីតិវិធីច្បាប់រហូតមកដល់ពេលចេញផ្សាយនេះ។
យោងតាមនីតិវិធីច្បាប់លោក កោ វណ្ណឌី ចៅក្រមស៊ើបសួរ នៃសាលាដំបូង ខែត្រព្រះសីហនុ បានបិទការស៊ើបសួរ និងជូនដំណឹងមកដើមចោទតាមរយៈលិខិតលេខ៦៦៥៣ រ.ប/ក/២៤ ចុះថ្ងៃទី៣ ខែធ្នូ ឆ្នាំ២០២៤ ព្រមទាំងសេច ក្ដីជូនដំណឹងមួយទៀតស្ដីពីការបញ្ជូនសំណុំរឿងទៅជំនុំជម្រះ លេខ៧១៨៣ រ.ប/ក/២៤ ចុះថ្ងៃទី៣០ ខែធ្នូ ឆ្នាំ២០២៤ ជាមួយនឹងការបញ្ជាក់ថា ចៅក្រមស៊ើបសួរនៃសាលាដំបូង ខែត្រព្រះសីហនុ បានសម្រេចចោទប្រកាន់ និងបញ្ជូន ជនត្រូវចោទឈ្មោះ អ៊ុក ផាន់ណារ៉េត ពីបទ «ហិង្សាដោយចេតនាមានស្ថានទម្ងន់ទោស» ដែលបទល្មើសព្រហ្មទណ្ឌនេះមានចែងឱ្យផ្ដន្ទាទោសតាមបញ្ញត្តិ មាត្រា២១៨ ចំណុចទី២ នៃក្រមព្រហ្មទណ្ឌ។
លោកស្រីមេធាវី អ៊ុក ចិន្តា ជាអគ្គនាយិកានៃការិយាល័យមេធាវី អេ.អាយ (A.I Law Office) ដែលមានអាសយ ដ្ឋាន អគារលេខ២៧៧ មហាវិថីព្រះនរោត្តម សង្កាត់ទន្លេបាសាក់ ខណ្ឌចម្ការមន រាជធានីភ្នំពេញ។ លោកស្រីមេ ធាវី មានប្រសាសន៍ដោយផ្អែកតាម មាត្រា៣៨ កថាខណ្ឌទី៧ នៃរដ្ឋធម្មនុញ្ញ បានចែងថា « វិមតិសង្ស័យ ត្រូវបានជាប្រយោជន៍ដល់ជនជាប់ចោទ។ ជនជាប់ចោទណាក៏ដោយត្រូវទុកជាមនុស្សឥតទោស ដរាបណាតុលាការមិនទាន់កាត់ទោសជាស្ថាពរ។ ជនគ្រប់រូបមានសិទ្ធិការពារខ្លួនតាមផ្លូវតុលាការ»។
មេធាវីបន្ថែមទៀតថា រាល់បុគ្គលដែលត្រូវបានចោទប្រកាន់ គឺជាអ្នកដែលធ្វើការបកស្រាយថាខ្លួនមិនបានប្រ ព្រឹត្តកំហុស ប៉ុន្តែផ្ទុយទៅវិញនៅក្នុង រឿងក្ដីព្រហ្មទណ្ឌ ជនសង្ស័យ ជនត្រូវចោទ ឬជនជាប់ចោទ មិនត្រូវបានសន្មតជាមុនថា មានទោសនោះឡើយ លុះត្រាតែមានសាលក្រម ឬសាលដីកាស្ថាពរពី ស្ថាប័នតុលាការ ដែលសម្រេចថា ជននោះពិតជាមានពិរុទ្ធភាព។
បើយោងតាមប្រភពពី អ្នកច្បាប់ជាន់ខ្ពស់ នៃសាលាឧទ្ធរណ៍ បានប្រាប់ « បាយ៉ង់ថាមស៍ » កាលថ្ងៃទី១២ ខែមករា ឆ្នាំ២០២៥ថា ករណីហិង្សានេះបើតុលាការចោទប្រកាន់មន្ត្រីរាជការណាម្នាក់ គឺត្រូវតែធ្វើសេចក្ដីជូនដំណឹងទៅសាមីក្រសួងដើម្បីផ្អាកការងារ និងផ្អាកប្រាក់ខែរបស់ពួកគេ។
ឆ្លើយតបនឹងករណីនេះលោក លី ចាន់តារ៉ា អ្នកនាំពាក្យ សាលាដំបូងខែត្រព្រះសីហនុ នៅរសៀលថ្ងៃទី១៧ ខែមករា ឆ្នាំ២០២៥ បានប្រាប់ «បាយ៉ង់ថាមស៍» ជាសំណេរតាមប្រព័ន្ធ តេឡេក្រាម ថា ករណីខាងលើ ចៅក្រមស៊ើបសួរ នៃសាលាដំបូង ខែត្រព្រះសីហនុ បានធ្វើការជូនដំណឹងទៅ ក្រសួងសាមីតាមរយៈ ក្រសួងយុត្តិធម៌ រួចហើយ។
គួរបញ្ជាក់ថា សំណុំរឿងព្រហ្មទណ្ឌលេខ៩២៥ ចុះថ្ងៃទី១៨ ខែកក្កដា ឆ្នាំ២០២៤ របស់ជនរងគ្រោះឈ្មោះ រ័ត្ន គន្ធី ប្ដឹង ចោទមេប៉ុស្តិ៍សង្កាត់លេខ៣ លោក អ៊ុក ផាន់ណារ៉េត ពីបទហិង្សាដោយចេតនាមានស្ថានទម្ងន់ទោស មួយនេះ ចៅក្រមស៊ើបសួរ នៃសាលាដំបូងខែត្របានសម្រេចចោទប្រកាន់ និងបញ្ជូនជនត្រូវចោទឈ្មោះ អ៊ុក ផាន់ណារ៉េត ពីបទ «ហិង្សាដោយចេតនាមានស្ថានទម្ងន់ទោស» ដែលបទល្មើសព្រហ្មទណ្ឌ នេះមានចែងឱ្យផ្ដន្ទាទោសតាមបញ្ញត្តិ មាត្រា២១៨ ចំណុចទី២ នៃក្រមព្រហ្មទណ្ឌ។ ក្នុងសំណុំរឿងនេះលោកចៅក្រម បានចេញដីកាបញ្ជូនរឿងទៅជំនុំជម្រះ លេខ៦៣៨ ដ.ស.រ.ជ/ក/២៤ ចុះថ្ងៃទី៣០ ខែធ្នូ ឆ្នាំ២០២៤ តែគេពុំទាន់ដឹងថា សវនាការទាក់ទងសំណុំរឿងនេះ នឹងបើកដំណើរការនៅថ្ងៃខែឆ្នាំណានៅឡើយទេ។ ដូច្នេះសូមរង់ចាំតាមដានព័ត៌មាននេះបន្តទៀត៕
