ភ្នំពេញៈ ទំនិញមកពីប្រទេសទី៣ ដែលបង់ពន្ធថ្លៃត្រូវគេ ហែកទូកុងតឺន័រ ឬ កាត់សៀល ទំនងជាមកពីវៀតណាម ហើយលួចដាក់បន្លំបង្កប់ក្នុងទំនិញចាប់ហួយត្រូវបានមន្ត្រីជំនាញនៃ អគ្គនាយកដ្ឋានគយ និងរដ្ឋាករកម្ពុជា សហ ការជាមួយ ព្រះរាជអាជ្ញា និងប៉េអឹមចុះធ្វើ « អនុលោមភាព » ដោយរកឃើញថា ប្រេងម៉ាស៊ីន ប្រេងបូម និងប្រេងប្រើប្រាស់រថយន្តផ្សេងៗជាច្រើនមុខទៀតពុំមាន វាយត្រាពន្ធគយនាំចូលឡើយ ស្ថិតនៅឃ្លាំងស្ដុកដ៏ធំមួយនៃ ខណ្ឌដង្កោ រាជធានីភ្នំពេញ កាលពីថ្ងៃទី១៤ ខែមករា ឆ្នាំ២០២៥។
ទំនិញហែកទូកុងតឺន័រនេះ ភាគច្រើនឆ្លងកាត់ ប្រទេសវៀតណាម តាមច្រករបៀង ដែលមានការបង់ពន្ធថ្លៃគឺមាន អាករពិសេស ក្នុងមួយតោនត្រូវបង់ពន្ធចូលថវិការដ្ឋជាង៧,០០០ ( ប្រាំពីរពាន់ ) ដុល្លារម៉េរិក តែបើគេលួចបង្កប់បន្លំដាក់ក្នុងទំនិញចាប់ហួយ ដែលគេហៅថា ទំនិញអ៊ឹមអូយូ ( MOU ) ក្នុងមួយតោន បង់ពន្ធចូលរដ្ឋប្រ ហែលជាង៥០ដុល្លារអាម៉េរិកតែប៉ុណ្ណោះ។ ដូច្នេះរដ្ឋខាតចំណូលពន្ធគយយ៉ាងខ្លាំង។ ការចុះចាប់ ប្រេងលោតឆ័ត្រ នេះគឺ គយធ្វើក្នុងលក្ខណៈស្ងាត់ៗមិនឱ្យប្រព័ន្ធផ្សព្វផ្សាយនានាដឹងនោះទេដោយខ្លាចបែកការណ៍…។
កាលថ្ងៃទី១១ ខែមករា ឆ្នាំ២០២៥ ក្រុមមន្ត្រីគយបានដឹកនាំកម្លាំងចម្រុះចុះចាប់ ទំនិញគេចពន្ធ អីចឹងដែរនៅម្ដុំ ផ្លូវជាតិលេខ៤ ប៉ែកខាងលិច រាជធានីភ្នំពេញ ផាកពិន័យជាប្រាក់ចូលរដ្ឋបានចំនួនជាង៥០ម៉ឺនដុល្លារអាម៉េរិក ឬ កន្លះលានដុល្លារ។ ទំនិញគេចពន្ធដែលគយចុះចាប់នេះវាប្រាកដណាស់ថា ពួកគេដឹងវានាំចូលពីវៀតណាមតាមច្រកណាមួយនោះ…។ ក៏ប៉ុន្តែពួកគេធ្វើជាមិនដឹងសុខចិត្តអង្គុយបក់ផ្សែងមិនព្រមពន្លត់ភ្លើងនោះទេ ព្រោះតែខ្លាចខូចផលប្រយោជន៍បុគ្គល។
យោងតាមអាជីវករម្នាក់ សុំមិនបញ្ចេញឈ្មោះបាននិយាយប្រាប់ « បាយ៉ង់ថាមស៍ » នៅរសៀលថ្ងៃទី១៦ ខែមករា ឆ្នាំ២០២៥ ថា ប្រេងគេចពន្ធ ឬ ប្រេងលោតឆ័ត្រ ទាំងនោះមានប្រហែលជាង៥ម៉ឺនលីត្រឯណោះ។ ជាធម្មតាខណៈ គយចាប់ទំនិញគេចពន្ធបាន ហើយម្ចាស់ទំនិញត្រូវតែចូលខ្លួនទៅបង់ពន្ធ និងផាតពិន័យចូលថវិការដ្ឋ។ បើមាន ការយឺតយ៉ាវ គយអាចពិន័យទ្វេគុណ។ ក្នុងរឿងដដែលនេះមន្ត្រីម្នាក់ទៀតបាននិយាយថា « ពួកគេបានត្រូវរ៉ូវគ្នាអស់ហើយ…»។
បើតាមការឱ្យដឹងពី អ្នករត់ជើងសារគយ ម្នាក់លើកឡើងថា ទំនិញប្រភេទទាំងនេះមាន អាករពិសេស ហើយមក ពី « សែនគយចល័ត » មិនត្រូវទើបគេចាប់យ៉ាងដូច្នោះ…។ ទំនិញនេះអាចនាំចូលតាមច្រករបៀងពី វៀតណាម ចូលមកកម្ពុជា។
នៅរសៀលថ្ងៃទី១៦ ខែមករា ឆ្នាំ២០២៥ លោក សែ សុឃន អគ្គនាយករងគយ និងរដ្ឋាករកម្ពុជា ដែលជាអ្នកនាំពាក្យ គឺអង្គភាពសារព័ត៌មានយើង ព្យាយាមទាក់ទងសុំការបំភ្លឺជាច្រើនដងតែទូរស័ព្ទហៅពុំចូលឡើយ។ ចំណែកការដាក់សំណួរនៅតាមប្រព័ន្ធ តេឡេក្រាម វិញក៏ពុំមានអ្នកចូលមើល និងឆ្លើយសំណួរអ្នកកាសែតនោះទេ។
គួរបញ្ជាក់ថា ទំនិញកាត់សៀល ឬទំនិញគេចពន្ធ ដែលមកពីប្រទេសទី៣ (ទំនិញអឺរ៉ុប) វាបានឆ្លងកាត់ ប្រទេស វៀតណាម ឬ ថៃ នោះគឺខាង អគ្គនាយកដ្ឋានគយ និងរដ្ឋាករកម្ពុជា ដឹងទិន្នន័យភ្លាមៗតែម្ដង។ ទំនិញគេចពន្ធ នេះបើសិនជាចង់នាំចូលមកកម្ពុជា បានលុះត្រាតែមាន « ចំណារឯកភាព » ពីលោក គុណ ញឹម អគ្គនាយកដ្ឋានគយ និងរដ្ឋាករកម្ពុជា៕
