ដីនោះនៅចំណុចជុំវិញបរិវេណអូរខ្យង និងបឹងអន្លុងផ្ជៀលស្ថិតក្នុងភូមិឃុំខាងលើក្បែរដី ក្រុមហ៊ុនហួរលី ហើយកន្លងមកក្រុមនិស្សិតធ្លាប់បានចុះវាស់វែងរួចហើយ ដែរតែមកដល់ពេលនេះពុំទាន់បានចេញបណ្ណសម្គាល់កម្មសិទ្ធិជូនពួកគាត់ទេ។
តំណាងប្រពលរដ្ឋលោក ផាន់ ណុន បានឲ្យដឹងថា ពួកគាត់បានចូលទៅកាន់កាប់ដីនៅចំណុចខាងលើចាប់តាំង ពី ឆ្នាំ២០១៧ ដោយគ្រួសារខ្លះកាប់រានដីបានចំនួន៣ហិកតា និងគ្រួសារខ្លះទៀតបានចំនួន៤ទៅ៥ហិកតា ហើយបាននាំគ្នាដាំដុះដំណាំផ្សេងៗដូចជា ស្វាយចន្ទី ទុរេន ដូង ដំឡូងមី ស្រូវ ពោត សណ្ថែក និងបន្លែបង្ការដើម្បីចិញ្ចឹមគ្រួសារ។
ក៏ប៉ុន្ដែមកដល់ចន្លោះ ឆ្នាំ២០២៣ និង ឆ្នាំ២០២៤ មានមន្ត្រីយោធាសឹករង ស្រុកកូនមុំ មួយក្រុមបាននាំគ្នាទៅបោះទីតាំងចិញ្ចឹមគោជិត១០០ក្បាលនៅក្បែរ ត្រពាំងអន្លុងផ្ជៀល។ តែគោទាំងនោះត្រូវបានគេព្រលែងឲ្យដើរយ៉ាងអនាធិបតេយ្យចូលស៊ីដំណាំកសិករ ហើយមិនមានអ្នកទទួលខុសត្រូវនោះទេ។ មិនតែប៉ុណ្ណោះក្រុមមន្ត្រីយោធានោះដើរវាយស្លាកនៅតាមដើមឈើហាមឃាត់ និងហ៊ុំព័ទ្ធដីនៅតំបន់នោះទាំងអស់គឺទាំង ដីបឹង ដីអូរ និងដីចម្ការ របស់ពលរដ្ឋដែលកំពុងតែអាស្រាយផលបានផ្លែផ្កាជារៀងរាល់ឆ្នាំ។
លោក តាអ៊ាន កសិករម្នាក់ក្នុងចំណោមអ្នករងគ្រោះជិត២០គ្រួសារបានបញ្ជាក់ថា គាត់មានដីចម្ការចំនួន៥ ហិកតាដីនោះ គាត់បានទិញពីអតីតទាហានខ្មែរក្រហម។ កន្លងមកក្រុមនិស្សិតបានចុះវាស់វែងរួចហើយមានបង្កាន់ដៃបញ្ជាក់ពីភូមិឃុំ។ ក៏ប៉ុន្ដែពេលនេះគាត់នៅពុំទាន់បានទទួលបណ្ណកម្មសិទ្ធិកាន់កាប់ដីចម្ការនោះទេ។ ថ្មីៗនេះបានលេចឮថា ដីខ្ញុំក៏ត្រូវប្រឈមគេដកហូតយកដាក់ជា ដីសង្គមកិច្ចអតីតយុទ្ធជន នោះដែរ…។
ករណីនេះមេ ឃុំត្រពាំងក្រហម លោក មៀក ម៉ី កាលពីព្រឹកថ្ងៃទី៥ ខែមីនា ឆ្នាំ២០២៥ បានប្រាប់ថា ពលរដ្ឋជិត ២០គ្រួសារពិតជាបានរស់នៅ និងអាស្រាយផលលើទីតាំងដីនោះមែន។ ប៉ុន្តែពួកគាត់មានទំនាស់ពាក្យសម្ដីជាមួយ ក្រុមទាហានសឹករង ស្រុកកូនមុំ។ តែកន្លងមកលោកធ្លាប់បានកោះហៅឈ្មោះ ណុន តំណាងពលរដ្ឋឲ្យចូលខ្លួនមកសាលាឃុំដើម្បីរកដំណោះស្រាយដែរតែគាត់អត់ព្រមចូលមកធ្វើការដោះស្រាយទេ។
លោកមេឃុំបន្តថា កាលពី ឆ្នាំ២០១៨ ក្រុមនិស្សិតបានចុះទៅវាស់វែងដីនោះដើម្បីផ្ដល់បណ្ណកម្មសិទ្ធិជូនពលរដ្ឋតែកាលនោះមានតែពលរដ្ឋរស់នៅ ភូមិ១ និង ភូមិ២ ទេដែលទទួលបានបណ្ណសម្គាល់កម្មសិទ្ធិដីធ្លី។ ដោយឡែកពលរដ្ឋជិត២០គ្រួសារទៀតនៅ ភូមិ៣ ពួកគាត់មានតែស្លាកបត្រក្បាលដីដែលបច្ចុប្បន្នបានតម្កល់ទុកនៅ មន្ទីរសុរិយោដីខែត្រ។ រឿងនោះមានតែមន្ត្រីជំនាញ និងក្រសួងសុរិយោដី ទេដែលអាចសើរើដោះស្រាយជូនពលរដ្ឋបាន។
បញ្ហានេះលោក មុយ សុផាត មេបញ្ជាការតំបន់ប្រតិបត្តិសឹករង ខែត្ររតនគិរី កាលពីថ្ងៃទី៥ ខែមីនា ឆ្នាំ២០២៥ បានផ្តល់បទសម្ភាសដល់ក្រុមអ្នកសារព័ត៌មានថា ដីដែលប្រជាពលរដ្ឋនាំគ្នាទៅរស់នៅអាស្រាយផលគឺជា ដីសង្គមកិច្ចអតីតយុទ្ធជន ទេតែបើពួកគាត់ធ្វើបានប៉ុនណារក្សានៅប៉ុណ្ណឹងសិនទៅ។ ពីមុនដីមានទំហំសរុបចំនួន៨៦៧០ ជាងហិកតាតែក្រោយមកបានកាត់ទៅឲ្យ៨៣ហិកតា នៅសល់ដីត្រឹមចំនួន៣៥០០ហិកតាដីនោះនៅសល់ប៉ុន្មានគឺទុកសម្រាប់ចែកជូនយោធិន និងមន្ត្រីរាជការ គ្រប់ក្រសួងមន្ទីរដែលចូលនិវត្ដន៍គឺក្រសួងជាអ្នករៀបចំបែងចែកតាមការជាក់ស្តែង។
ទោះជាយ៉ាងនេះក្ដីប្រជាពលរដ្ឋជិត២០គ្រួសារនោះនៅតែបន្ដសំណូមពរយ៉ាងទទូចទៅ សម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចបវរធិបតី ហ៊ុន ម៉ាណែត នាយករដ្ឋមន្ត្រ សូមមេត្ដាជួយអន្ដរាគមន៍ទៅអាជ្ញាធរពាក់ព័ន្ធ ខែត្ររតនគិរី ដើម្បីដោះស្រាយកាត់ឆ្វៀលដីដែលពួកគាត់បានរស់នៅដាំដុះដំណាំ និងអាស្រាយផលជិត១០ឆ្នាំកន្លងមកដើម្បីទទួលបានសិទ្ធិកាន់កាប់ និងរស់នៅបន្ដដោយស្របច្បាប់៕
