ក្រុមគ្រួសារលោក សឹង សារិន រួមទាំងអ្នករស់នៅក្នុងស្រុក និងក្រុមគ្រួសារដែលរស់នៅក្រៅប្រទេសបានចូលលុយគ្នាដើម្បីទិញដីមួយកន្លែងស្ថិតនៅ ភូមិ៦ សង្កាត់លេខ៤ ក្រុង-ខែត្រព្រះសីហនុ ចាប់តាំងពី ឆ្នាំ១៩៩២ មកម៉្លេះ។ ដីនេះក៏បានទទួលប្លង់ដីអ៊ិលម៉ាម ( L-Map ) តាំងពី ឆ្នាំ២០១០ និងបានបង់ពន្ធដីជូនរដ្ឋត្រឹមត្រូវអស់រយៈពេលជាង១០ឆ្នាំកន្លងមកហើយ។
ដីធ្លីរបស់ពលរដ្ឋនេះក៏មានស្នាមេដៃទទួលស្គាល់ព្រំដី និងមានឯកសារ ឬលិខិត ចេញដោយ មន្ទីររៀបចំដែនដី បញ្ជាក់ថា ដីរបស់ពួកគាត់ មានប្លង់រឹង L-Map ស្របច្បាប់ត្រឹមត្រូវ។ ក៏ប៉ុន្តែបែរជាត្រូវតុលាការបង្គាប់ឱ្យផ្ទេរសិទ្ធិទៅឱ្យឈ្មោះ ប៉ុល សារឿន កាលពីថ្ងៃទី៦ ខែមីនា ឆ្នាំ២០២៥។
ដីមានទំនាស់នេះកាលពីថ្ងៃធ្វើប្លង់ជាប្រព័ន្ធនៅ ឆ្នាំ២០១០ គឺមន្ត្រីជំនាញបានចុះវាស់វែងជាក់ស្តែង និងបានបិទប្រកាសផ្សព្វផ្សាយតាមនីតិវិធីត្រឹមត្រូវ។ ពួកគាត់ក៏ទទួលបានប្លង់រឹងយកមកកាន់ក្នុងដៃ ព្រមទាំងបានបង់ពន្ធជូនរដ្ឋជាបន្តបន្ទាប់រហូតមក។ ក៏ប៉ុន្តែបែរជាត្រូវបុគ្គលមានអំណាចខាងលើប្តឹងពួកគាត់ទៅ តុលាការ ដើម្បីទាមទារយកដីពីពួកគាត់ទៅវិញ?
ហេតុដូច្នេះពលរដ្ឋរងគ្រោះពុំមានអ្វីក្រៅពីលើកម្រាមដៃ១០សំណូមពរដល់សម្តេចតេជោ ហ៊ុន សែន ប្រធានព្រឹទ្ធ សភា និងសម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា សូមមេត្តាជួយអន្តរាគមន៍រកយុត្តិធម៌ជូនគ្រួសារពួកគាត់រងគ្រោះនេះផង។
ករណីវិវាទដីធ្លីនេះ ក្រុមអ្នកសារព័ត៌មាន បានព្យាយាមសុំរបាយការណ៍ព័ត៌មានពីភាគីពាក់ព័ន្ធមិនបានទេ។ ក៏ប៉ុន្តែកាលពីរសៀលថ្ងៃទី៦ ខែមីនា ឆ្នាំ២០២៥ លោក សេង នីម ចៅសង្កាត់លេខ៤ ឯកឧត្ដម ប៉ុល សារឿន និងលោក អ៊ឹម សុភ័ក្រ អាជ្ញាសាលា អ្នកសារព័ត៌មានយើងពុំអាចសុំការស្រាយបំភ្លឺបានទេជុំវិញករណីវិវាទដីធ្លីខាងលើនេះ៕
