មន្ទីរពេទ្យបង្អែក ស្រុកឈូក មានបុគ្គលិកសរុបចំនួន៩១នាក់មានទាំង ជំនាញផ្នែករដ្ឋបាល,របួស និងវះកាត់ ឆ្មប សន្លាក់,មន្ទីរពិសោធន៍ ផ្នែកឱសថ,របេង,ភ្នែក,វិទ្យុសាស្ត្រ,ពិគ្រោះជំងឺ,ជំងឺទូទៅ,កុមារ,សម្ភព។ល។
មន្រ្តីម្នាក់បាននិយាយប្រាប់អង្គភាព បាយ៉ង់ថាមស៍ ឱ្យដឹងនៅកាលពីថ្ងៃទី៣ ខែមីនា ឆ្នាំ២០២៥ ថា លោកប្រធានមន្ទីរពេទ្យឈឺក្បាលនឹងមហាជនត្អូញត្អែរពីភាពអសកម្មរបស់គ្រូពេទ្យជំនាញមួយចំនួនក្នុងម៉ោងរដ្ឋទៅបម្រើការនៅពេទ្យឯកជនផ្ទាល់ខ្លួន។ ខណៈពេលអ្នកជំងឺត្រូវការបន្ទាន់បែរជាគ្មានគ្រូពេទ្យ ឬអាចនិយាយបានថា ត្រូវរង់ចាំក្នុងរយៈពេលយូរម៉ោងពីព្រោះគ្រូពេទ្យខ្លះទាល់តែទូរស័ព្ទហៅបានមកកន្លែងធ្វើការ ហើយគ្រូពេទ្យនោះបម្រើការងារឯកជនមាន២ទៅ៣គ្លីនិកឯណោះ។ តើហេតុអ្វីមន្ត្រីស៊ីប្រាក់ខែរដ្ឋបែរជាយកម៉ោងរដ្ឋទៅបម្រើការ ងារឱ្យឯកជនទៅវិញ ?
លោកវេជ្ជបណ្ឌិត ថោង តេរ៉ូ ប្រធានមន្ទីរពេទ្យបង្អែក ស្រុកឈូក ខែត្រកំពត នៅរសៀលថ្ងៃទី១១ ខែមីនា ឆ្នាំ ២០២៥ បានបញ្ជាក់ថា បុគ្គលិកនៅក្នុងមន្ទីរពេទ្យរបស់លោកមានចំនួន៩១នាក់។ ករណីខាងលើឥឡូវពុំមាននោះទេក៏ប៉ុន្តែពីមុនវាអាច…។ លោកក៏បានបន្តថា កន្លងមកមានគ្រូពេទ្យខ្លះគាត់រកស៊ីនៅផ្ទះតែដល់ម៉ោងរដ្ឋគាត់ មកធ្វើការធម្មតា…។
អនុប្រធានមន្ទីរពេទ្យលោក កង សំអាត នៅរសៀលថ្ងៃទី១១ ខែមីនា ឆ្នាំ២០២៥ ទូរស័ព្ទរបស់លោកមិនអាចទាក់ទងសុំសុំការបំភ្លឺបានទេ។ ដោយអាងតួនាទីជា អនុប្រធានមន្ទីរពេទ្យបង្អែក ស្រុកឈូក លោកពុំសូវចូលធ្វើការ ហើយក៏ពុំសូវឃើញចុះវត្តមាននឹងគេនោះដែរ។
ប្រធានប្រតិបត្តិ នៃមន្ទីរពេទ្យបង្អែក ស្រុកឈូក លោក កែ រដ្ឋាវុធ បាននិយាយការពិតប្រាប់ បាយ៉ង់ថាមស៍ កាលពីរសៀលថ្ងៃ៣ ខែមីនា ឆ្នាំ២០២៥ ថា លោកក៏មានភាគហ៊ុននៅក្នុងក្លីនិកឯកជនឈ្មោះ « មន្ទីរពេទ្យសម្រាកព្យាបាល និងសម្ភពរស្មីឈូក » បន្តិចបន្តួចដែរ។ ប៉ុន្តែលោកមិនបានយកម៉ោងរដ្ឋទៅធ្វើការទេ។ លោកបន្តថា លោកធ្វើតែពេលទំនេរ ហើយក្លីនិករបស់លោកមិនបានយកបុគ្គលិករបស់ មន្ទីរពេទ្យ ទៅធ្វើការដែរ។
កន្លងទៅថ្មីៗនេះខណៈពលរដ្ឋមួយចំនួនបានលើកឡើងថា គ្រូពេទ្យបង្អែកខ្លះមិនសូវយកចិត្តទុកដាក់ជាមួយនឹងអ្នកជំងឺនោះទេ។ ពួកគេបានទុកអ្នកជំងឺចោលរហូតដល់មានអ្នកជំងឺខ្លះទៀតស្លាប់ក៏មានដែរ។
គួររំលឹកថា កាលពីប៉ុន្មានថ្ងៃកន្លងទៅថ្មីៗនេះ អ្នកជំងឺម្នាក់រស់នៅ ភូមិក្រហូង ឃុំឈូក ស្រុកឈូក ខែត្រកំពត បានស្លាប់នៅមន្ទីរពេទ្យបង្អែក ស្រុកឈូក៕
