ខែត្រកោះកុងៈ មេបញ្ជាការប្រតិបត្តិសឹករង ស្រុកស្រែអំបិល គឺលោក ថន ឃិន បានជេរប្រមាថមើលងាយ អ្នកសារព័ត៌មាន ថា « ពួកអាអ្នកកាសែតអាចម៍ ពួកវាចេះតែបង្ហោះព័ត៌មាន ពួកវាមិនដឹងខ្យល់អ្វីទេ អាជ្ញាធរគេមិនអើពើអីផង ពួកអ្នកកាសែតដេញ ដោលសួរនោះសួរ ពួកអាឆ្កួត ខ្ញុំហ៊ានថា ពួកវាអីចឹង »។ លើសពីនេះ លោកបានទម្លាយស្ទើរខ្ទេចខ្ទីអំពីរបៀបគប់គិតគ្នាជាប្រព័ន្ធនូវទង្វើកខ្វក់លួចទ្រព្យសម្បត្តិសាធារណៈរបស់រដ្ឋដីឆ្នេរសមុទ្រ។ នេះបើយោងតាមសារសំឡេងបែកធ្លាយដែល បាយ៉ង់ថាមស៍ទទួលបានកាលពីថ្ងៃទី១០ ខែកុម្ភៈ ឆ្នាំ ២០២៥។
លោក ថន ឃិន មេបញ្ជាការប្រតិបត្តិសឹករង ស្រុកស្រែអំបិល ខែត្រកោះកុង។ តាមប្រព័ន្ធទូរស័ព្ទលោកបានឆ្លើយបដិសេធជាមួយសំណួររបស់ « បាយ៉ង់ថាមស៍ » ថា លោកមិនមានជាប់ពាក់ព័ន្ធនឹងការចាក់ដីចូលឆ្នេរសមុទ្ទស្ថិតនៅ ភូមិជ្រោយស្វាយ ឃុំជ្រោយស្វាយ ស្រុកស្រែអំបិល ខែត្រកោះកុង នោះទេ។ ក៏ប៉ុន្តែលោកបានលាតត្រដាងប្រាប់ប្រព័ន្ធផ្សព្វផ្សាយព័ត៌មានក្នុងស្រុកដោយឥតលាក់លៀមថា លោកបានប្រើគ្រឿងចក្រ និងចាក់ដីចូលឆ្នេរសមុទ្រខាងលើមែន គឺគេជួលឱ្យចាក់ លោកចាក់ដីគេឱ្យលោកឈប់ លោកឈប់ ឥឡូវលោកឈប់ចាក់ហើយ។ (មានសារជាសំឡេង)។
តាមការចុះទៅផ្ដិតយករូបភាពផ្ទាល់របស់ក្រុមការងារ នៃអ្នកសារព័ត៌មានពិនិត្យឃើញថា ការចាក់ដីលុបចូលឆ្នេរសមុទ្រខាងលើនេះមានទ្រង់ទ្រាយធំសម្បើមណាស់។ ប៉ុន្តែអាជ្ញាធរមូលដ្ឋាន និងមន្រ្តីជំនាញពាក់ព័ន្ធ ហាក់បីដូចជាមើលមិនឃើញ គឺទំនងជាត្រូវថ្នាំសណ្ដំអ្វីម្យ៉ាង…។
ករណីនេះបន្ទាប់ពីមានការផ្សព្វផ្សាយព័ត៌មានរបស់អ្នកកាសែតក្នុងស្រុកមួយចំនួន មន្រ្តីជំនាញ និងអាជ្ញាធរមូលដ្ឋានបានចុះទៅហាមឃាត់ដែរនៅតែមានការលួចចាក់ដីម្ដងហើយម្ដងទៀត រហូតដល់លើកទី៤បានសម្រេចទើបការចាក់ដីខាងលើបានផ្អាកកាលពីថ្ងៃទី៧ ខែកុម្ភៈ ឆ្នាំ២០២៥។ នេះបើយោងតាមការឱ្យដឹងពី ប្រធានសហគមន៍ជ្រោយស្វាយ និងមន្រ្តីម្នាក់នៅសាលា ឃុំជ្រោយស្វាយ កាលពីរសៀលថ្ងៃទី៧ ខែកុម្ភៈ ឆ្នាំ២០២៥។
ដោយឡែកមន្រ្តីជំនាញពាក់ព័ន្ធ លោកអភិបាល ស្រុកស្រែអំបិល លោកមេ ឃុំជ្រោយស្វាយ ព្រមទាំងម្ចាស់ទីតាំង អ្នកសារព័ត៌មានយើងពុំអាចសុំការបញ្ជាក់បានទេថា តើទីតាំងដែលគេចាក់ដីលុបចូលឆ្នេរសមុទ្រខាងលើ មានទំហំប៉ុណ្ណា ទទឹងប៉ុន្មាន និងបណ្ដោយប្រវែងប៉ុន្មានម៉ែត្រ ? នោះឡើយ។
គួររំឭកថា ទីតាំងខាងលើមានការទិញលក់ដីជាច្រើនដំណាក់កាល តែម្ចាស់ទីតាំងដីចុងក្រោយគេជាអនិកជនខ្មែររស់នៅអាម៉េរិក មានសាច់ញាតិជាអ្នកធំស្ទើរផុតលេខនៅពីក្រោយខ្នង ដែលគ្មាននរណាហ៊ានប៉ះពាល់នោះទេ៕
