ស៊ីអ៊ិនស៊ី បញ្ជាក់ទៀតថា កញ្ញា នូ មៈនេត្រអាថាណ្ណា បានចូលបម្រើការងារនៅក្រុមហ៊ុន CBS កាលពីថ្ងៃទី១ ខែកញ្ញា ឆ្នាំ២០០៩ ក្នុងតួនាទីជាពិធីការិនី នៃកម្មវិធីព័ត៌មានពេលព្រឹក។ ក្នុងនាមជាពិធីការិនីមួយរូប កញ្ញា នូ មៈនេត្រអាថាណ្ណា បានបំពេញការងារយ៉ាងល្អ ទទួលបានការគោរពស្រឡាញ់ និងកោតសរសើរពីបុគ្គលិកគ្រប់ផ្នែក ព្រមទាំងបានការគាំទ្រពីសំណាក់ទស្សនិកជនទូទៅ។ មរណភាពរបស់កញ្ញា គឺជាការបាត់បង់នូវធនធនមនុស្សដ៏សំខាន់សម្រាប់ ក្រុមហ៊ុន CBS ហើយក៏ជាការបាត់បង់នូវ « បញ្ញាវន្តដ៏ឆ្នើម » ក្នុងវិស័យសារព័ត៌មាន។
ថ្នាក់ដឹកនាំ ក្រុមហ៊ុន CBS សូមចូលរួមរំលែកមរណទុក្ខ និងក្តីអាឡោះអាល័យបំផុតជាមួយ ក្រុមគ្រួសារកញ្ញា នូ មៈនេត្រអាថាណ្ណា និងសូមបួងសួងដល់គុណបុណ្យព្រះរតនត្រ័យ កែវទាំងបី វត្ថុស័ក្តិសិទ្ធិក្នុងលោក និងទេព្តាទាំង១ម៉ឺនលោកធាតុសូមជួយពាំនាំដួងវិញ្ញាណក្ខន្ធ កញ្ញា អាថាណ្ណា ទៅកាន់សុគតិភពកុំបីឃ្លៀងឃ្លាតឡើយ។
សូមបញ្ជាក់ថា សពកញ្ញានូ មៈនេត្រអាថាណ្ណា នឹងត្រូវតម្កល់ធ្វើបុណ្យតាមប្រពៃណីព្រះពុទ្ធសាសនាខ្មែរនៅគេហដ្ឋានក្នុងបុរីវិមានភ្នំពេញ ផ្លូវជាសុផារ៉ា (៥៩៨) រាជធានីភ្នំពេញ៕
