លោកវរសេនីយ៍ឯក ខឹម សាម៉ុន អធិការនគរបាល ស្រុកសាមគ្គីមុនីជ័យ ឱ្យដឹងថា ពលរដ្ឋបានរាយការណ៍មកកាន់ អធិការដ្ឋាន ពីការជួបជុំគ្នារវាងមនុស្សគ្រងស្បង់ចីពរសង្ឃ និងក្មេងៗនៅក្នុងព្រៃមួយកន្លែងខាងលើនាំគ្នាផឹកស្រានិងហូបសាច់រួមទាំងចាក់ភ្លេងឮខ្លាំងៗក្នុងរាត្រីកម្សាន្តសប្បាយ។ ក្រោយទទួលបានព័ត៌មានកម្លាំង នៃអធិការដ្ឋាន និងពលរដ្ឋ ក៏បានចុះទៅដល់កន្លែងកើតហេតុហើយពិនិត្យឃើញថា ពិតជាមានសង្ឃ និងក្មេងស្ទាវៗ និងកំពុងផឹកស៊ីយ៉ាងសប្បាយពិតប្រាកដមែន។
ប្រភពបញ្ជាក់ទៀតថា ដោយទទួលបទបញ្ជាពី លោកឧត្តមសេនីយ៍ទោ ឃឹម សុកខៃ ស្នងការនគរបាល ខែត្រកំពង់ស្ពឺ កម្លាំងប្រតិបត្តិការក៏បានឡោមព័ទ្ធ និងឃាត់ខ្លួនមនុស្ស៧នាក់ដើម្បីយកសាកសួរ និងអប់រំ។ សមត្ថ កិច្ចក៏បានដកហូតម៉ូតូ៣គ្រឿងទូរស័ព្ទដៃ៧គ្រឿង power bank ៣គ្រឿង កាបូបលុយ២ លុយ៥ម៉ឺនរៀល បារី២កញ្ចប់ ដែកកេះ៣ បៀ១ហ៊ូ កម្រាល១ និងធុងទឹកក១។ សមត្ថកិច្ចបានបញ្ជូនខ្លួនសង្ឃ និងបក្ខពួកទៅកាន់ ធម្មការស្រុក ដើម្បីបន្តនីតិវិធីតាមផ្លូវពុទ្ធសាសនា។
ស្នងការដ្ឋាននគរបាល ខែត្រកំពង់ស្ពឺ ក៏បានអំពាវនាវទៅដល់បងប្អូនពលរដ្ឋជា ពុទ្ធសាសនិក កុំដាក់បន្ទុករួមដល់ ព្រះសង្ឃទូទៅ។ ព្រោះថានេះជាការប្រព្រឹត្តិរបស់បុគ្គលតែប៉ុណ្ណោះ៕
