ដោយៈ បាយ៉ង់ថែមស៍
ភ្នំពេញៈ សិល្បៈការិនីផ្នែកកំប្លែង ស្រីអ៊ីត មានឈ្មោះដើមថា សេង ចិន្តា ស្ថិតក្នុង ក្រុមនាពែកមី នៃទូរទស្សន៍ CTN បានលើកឡើងនៅរសៀលថ្ងៃទី១៣ ខែមីនា ឆ្នាំ២០២១ នេះថា នាងពិតជាមានវិជ្ជាមានវីរុសកូវីដ១៩។ ក្រោយពីធ្វើតេស្តរួចចេញលទ្ធផល វិជ្ជមានវីរុសកូវីដ១៩ ក្រុមគ្រូពេទ្យ ក៍បានទៅយកនាងដល់ផ្ទះក្បែរវត្តទួល ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ កាលពីយប់ថ្ងៃទី១២ ខែមីនា ឆ្នាំ២០២១។
តារាកំប្លែងលេងសម្ដីច្រើនរូបនេះអះអាងថា នាងបានប៉ះពាល់ដោយប្រយោលជាមួយនឹងសិល្បការីនីផ្នែក ចម្រៀង វី ឌីណែត ជាកូនស្រីលោក ហួរ ឡាវី។ មិនដល់មួយសប្តាហ៍ផងសិល្បករ សិល្បាការិនី ឆ្លងជំងឺ កូវីដ១៩ យ៉ាងតិចចំនួនប្រាំមួយនាក់។
នៅរសៀលថ្ងៃទី១៣ ខែមីនា នេះដដែលលោកតា វ៉ិចទ័រ អ្នកដឹកនាំក្រុមកំប្លែងស៊ីធីអ៊ិន ក៍កំពុងរង់ចាំលទ្ធផលធ្វើតេស្តកូវីដ នេះដែរ។ លោកបានប្រាប់អ្នកកាសែតថា ក្មួយស្រីរបស់ស្ត្រីអ្នកកំប្លែង ស្រីអ៊ីត ក៍ឆ្លងកូវីដ១៩ ដែរ។ ដោយឡែកអ្នកផ្សេងទៀតកំពុងតែរង់ចាំលទ្ធផលតេស្តពី ក្រសួងសុខាភិបាល៕
